Tani partnerë të privilegjuar?! Shtëpia e Bardhë përjashton Rusinë e Korenë e Veriut nga tarifat “Trump”. Nuk falen Ukraina e aleatët
Rusia dhe Koreja e Veriut janë të vetmet kombe që nuk përballen me tarifat e SHBA-së. Shtëpia e Bardhë ka marrë vendimin për të mos përfshirë Rusinë në listën e saj të gjerë të vendeve që do të përballen me tarifa të reja, duke filluar nga sot.
Ndërsa zbuloi tarifat e tij të mërkurën, Trump përshëndeti “bashkëpunimin e mirë” midis Rusisë dhe Ukrainës, ndërsa nënvizoi dëshirën e tij për të ndaluar luftën. Sanksionet e SHBA-së ndaj Moskës tashmë “përjashtojnë çdo tregti kuptimplotë”, tha sekretarja e shtypit e Shtëpisë së Bardhë Karoline Leavitt për Axios, të mërkurën.
Kjo vjen ndërsa negociatori kryesor i Vladimir Putinit, Kirill Dmitriev, zhvilloi takime në Uashington. I dërguari i Putinit për investimet dhe një nga anëtarët e elitës ruse, z. Dmitriev, që u takua dje me zyrtarë amerikanë në Uashington, është zyrtari më i lartë rus që ka vizituar SHBA-në që nga pushtimi i Ukrainës në shkurt 2022.
Donald Trump e kishte kërcënuar më herët Moskën me tarifa për naftën e papërpunuar, duke shtuar se ai ishte i “paqetësuar” me Vladimir Putin lidhur me komentet e tij të fundit për Ukrainën.
Në të njëjtën kohë, Ukraina e goditur nga lufta po përballet me tarifa prej 10 për qind nga administrata amerikane.Një ekip nga Ukraina mund të shkojë në Shtetet e Bashkuara këtë javë ose javën e ardhshme, tha dje sekretari amerikan i thesarit Scott Bessent për televizionin Bloomberg.
“Ne kemi kaluar së bashku një dokument të kompletuar për partneritetin ekonomik (që) aktualisht po shqyrtohet nga ukrainasit dhe shpresojmë të shkojmë në diskutime të plota dhe ndoshta edhe të marrim nënshkrime javën e ardhshme”, tha Bessent./tpz.al