Flotilja e ndihmës me destinacion Gazën kërkon mbrojtje evropiane mes kërcënimeve i.zraelite
Flotilja Globale Sumud, e cila shkon në Gaza, kërkoi të mërkurën mbrojtje nga qeveria spanjolle dhe Evropa, mes kërcënimeve izraelite. "Izraeli po kërcënon Flotiljen Globale Sumud, anije që transportojnë ilaçe dhe ushqime në Gaza në një mision humanitar. Ne kërkojmë që Qeveria dhe Evropa të veprojnë për ta siguruar mbrojtjen e tyre në përputhje me ligjin ndërkombëtar", shkroi Flotilja në kompaninë amerikane të mediave sociale X. Ajo njoftoi se delegacioni pakistanez iu bashkua flotiljes malajziane Sumud Nusantara, e cila gjithashtu po i bashkohet Flotiljes Globale Sumud për të thyer bllokadën e Izraelit.
Organizata humanitare me seli në Itali EMERGENCY njoftoi gjithashtu të martën se po i bashkohet flotiljes në rrugën për në Gaza me anijen e saj të kërkim-shpëtimit Life Support" për të vepruar si vëzhgues dhe për të ofruar mbështetje mjekësore dhe logjistike për anijet pjesëmarrëse".
Duke e përshkruar atë që po ndodh në Gaza si "të papranueshme", organizata humanitare italiane vuri në dukje se do të niset nga Catania, së bashku me anijet që janë pjesë e delegacionit italian.
"Ndërsa qeveritë tona nuk kanë qenë në gjendje të marrin masa për të ndaluar një situatë që po përkeqësohet dita-ditës, qytetarët nuk janë të gatshëm të qëndrojnë duarkryq dhe të shikojnë," shkroi EMERGENCY në një deklaratë.
Ndërkohë, një e përditshme spanjolle raportoi të mërkurën në orët e para të mëngjesit se nga 30 anijet që u nisën nga Barcelona të hënën pasdite, pesë u detyruan të ktheheshin dhe dy nuk mundën të largoheshin nga porti për shkak të problemeve mekanike.
Rreth 20 anije thuhet se po shkojnë drejt Tunizisë për t'u bashkuar me 20 anije të tjera në dërgimin e ndihmës në Gaza, me një ndalesë të shkurtër dhe të pazbuluar në Ishujt Balearik të Spanjës./trt