Avioni i parë luftarak i prodhuar në Turqi përfundon me sukses fluturimin e parë
Avioni i parë luftarak i prodhimit vendas i Turqisë, KAAN, përfundoi me sukses sot fluturimin e tij fillestar, si pjesë e projektit të forcimit të aviacionit që vendi filloi në vitin 2016. Kompania turke “Turkish Aerospace Industries Inc.” (TUSAS) nënshkroi një kontratë me firmën britanike “BAE Systems plc” me vlerë 125 milionë dollarë në vitin 2017 për të zhvilluar një lloj avioni luftarak të gjeneratës së ardhshme. TUSAS ndau një video që tregon avionin luftarak duke u ngritur dhe më pas duke u kthyer në një bazë ajrore në veri të Ankarasë.
“Me KAAN, vendi ynë nuk do të ketë vetëm avionë luftarakë të gjeneratës së pestë, por edhe teknologji që pak vende në botë e kanë”, tha Haluk Gorgun, kreu i Drejtorisë së Industrisë së Mbrojtjes të Turqisë, në një postim në Platformën X.
Turqia synon të përdorë motorë të prodhuar në vend në këta avionë luftarakë, shtoi Gorgun, i cili pritet të nisë në vitin 2028, raporton Reuters.
Avioni i ri luftarak tani për tani do të fuqizohet nga dy motorë F-110 të General Motors, të cilët përdoren gjithashtu në avionët F-16 të gjeneratës së katërt të Lockheed Martin.
Turqia së fundmi siguroi një kontratë për të blerë 40 avionë luftarakë F-16 dhe 79 komplete modernizimi për avionët e saj ekzistues të të njëjtit lloj nga SHBA, pasi procesi ishte vonuar për disa kohë.
SHBA vendosi sanksione ndaj industrisë turke të mbrojtjes në dhjetor 2020 për blerjen e sistemit rus të mbrojtjes raketore S-400 dhe e përjashtoi Ankaranë nga programi i avionëve luftarakë F-35. Ankaraja është gjithashtu e interesuar të blejë 40 avionë Eurofighter Typhoon, të cilët prodhohen nga një konsorcium i Gjermanisë, Britanisë, Italisë dhe Spanjës./Nga Euronews.al