“Adolf Hitleri” pritet të fitojë zgjedhjet në shtetin afrikan
Në Namibi po zhvillohen zgjedhjet rajonale dhe lokale, ndërsa vëmendjen e ka marrë një kandidat me një emër që bie fort në sy: Adolf Hitler Uunona. Politikan 59-vjeçar dhe anëtar i partisë në pushtet SWAPO, ai pritet të sigurojë edhe një mandat tjetër në zonën Ompundja, ku ka dominuar prej gati dy dekadash.
Uunona u zgjodh për herë të parë në vitin 2004 dhe ka arritur të mbajë vazhdimisht postin, përfshirë zgjedhjet e vitit 2020 ku mori rreth 85% të votave. Parashikimet e Komisionit Zgjedhor të Namibisë tregojnë se ai mbetet favorit i qartë edhe këtë vit.
Pavarësisht emrit të pazakontë, ai është distancuar plotësisht nga çdo lidhje me diktatorin nazist. Në intervista të mëparshme ai ka thënë se emri iu vendos nga i ati, i cili “me shumë gjasë nuk e kuptonte çfarë përfaqësonte Adolf Hitleri”. Ai thekson se nuk ka asnjë lidhje me ideologjitë naziste dhe se emri i tij është thjesht një mbetje historike.
Namibia ka qenë nën sundimin kolonial gjerman nga viti 1884 deri në 1915, periudhë gjatë së cilës u kryen mizori të rënda ndaj popullsisë Herero dhe Nama. Edhe sot ndikimi gjerman është ende i pranishëm në emra, ndërtesa dhe kulturë.
Uunona, i cili përdor publikisht vetëm emrin "Adolf", është bërë shpesh temë diskutimesh në rrjetet sociale, por për banorët e zonës së tij rëndësi ka puna që ai ka bërë ndër vite. Ai ka deklaruar se nuk ka ndërmend të ndryshojë emrin për shkak të dokumentacionit zyrtar dhe se çdo përpjekje për ta lidhur me ideologji ekstreme është e pabazë./joq