Zelensky përplas Rusinë dhe Serbinë, Lavrov: Është e papranueshme që “vëllezërit” serbë të financojnë Ukrainën
Nuk zgjati shumë indiferenca e Moskës ndaj vizitës miqësore të Volodimir Zelenskyt në Beograd. Shefi i diplomacisë ruse Sergei Lavrov e përqendroi vëmendjen tek mundësia e përfshirjes së Serbisë në financimin e Ukrainës, duke e cilësuar një veprim të tillë si krejtësisht të papranueshëm për Moskën, teksa iu referua raporteve për bashkëpunimin e Beogradit me Kievin dhe Bashkimin Europian. “Do të ishte e papranueshme për ne nëse vëllezërit tanë serbë do të merrnin pjesë në financimin e Ukrainës.
Ne ndërkohë do t’i ashpërsojmë ndjeshëm metodat tona, me qëllim që të shkatërrojmë gjithçka që ushqen makinerinë luftarake të Kievit nga Perëndimi”, tha ministri i jashtëm i Rusisë, Sergei Lavrov.
Sa për marrëdhëniet mes Aleksandar Vuçiçit dhe homologut të tij ukrainas, Lavrov u përpoq të tregonte se në fakt bëhej fjalë për një manovër të presidentit serb, i cili sipas ministrit rus, thjesht vendosi ta priste Zelenskyn në Beograd me qëllim që të zbusë atë që ministri rus e përshkroi si “presion të paturpshëm” nga Bashkimi Europian.
Lavrov e ka ashpërsuar edhe më tej retorikën ndaj Brukselit, duke deklaruar se “BE-ja tashmë është shndërruar në Rajhun e Katërt”. Deklaratat e tij vijnë në një kohë kur Serbia po përpiqet të ruajë marrëdhëniet tradicionale me Rusinë, ndërsa paralelisht vazhdon procesin e saj drejt anëtarësimit në BE. Pak ditë më parë, Vuçiç deklaroi se Beogradi do të mbështesë integritetin territorial dhe pavarësinë e Ukrainës, si dhe synon të thellojë bashkëpunimin ekonomik mes dy vendeve.
Megjithatë, ai u tregua i kujdesshëm të mos ndërmerrte ndonjë zotim për vendosjen e sanksioneve ndaj Rusisë, aleatit tradicional të Serbisë. Zelensky zhvilloi javën e kaluar një vizitë dyditore në Beograd, ku zhvilloi takime me zyrtarë të lartë serbë.