Putin: Konflikti në Ukrainë "nuk i ngjan aspak" situatës në Gaza
Presidenti i Rusisë, Vladimir Putin, tha se konflikti në Ukrainë "nuk i ngjan aspak" asaj që po ndodh në Rripin e Gazës, i goditur prej më shumë se dy muajsh nga sulmet izraelite.
"Sapo biseduam për këtë situatë... lidhur me krizën ukrainase. Por ju dhe të gjithë të pranishmit këtu dhe në mbarë botën e shihni. Shikoni operacionin special ushtarak (në Ukrainë) dhe çfarë po ndodh në Gaza dhe bëni dallimin. Nuk ka asgjë të tillë në Ukrainë", tha Putin gjatë një konference vjetore për media në Moskë.
Putin më tej tha se ngjarjet në Rripin e Gazës përbëjnë një "katastrofë", duke theksuar komentet e Sekretarit të Përgjithshëm të OKB-së, Antonio Guterres, i cili tha se enklava e bllokuar është bërë "varreza më e madhe për fëmijët në botë".
"Ky është një vlerësim objektiv, çfarë mund të them këtu", tha Putin.
Ai tha gjithashtu se homologu i tij turk Recep Tayyip Erdoğan po luan një rol udhëheqës në zgjidhjen e situatës në Gaza.
“Ai është, natyrisht, një nga liderët e bashkësisë ndërkombëtare që i kushton vëmendje kësaj tragjedie dhe bën gjithçka për të siguruar që situata të ndryshojë për mirë, në mënyrë që të krijohen kushte për paqe afatgjatë”, shtoi Putin.
Izraeli ka bombarduar Rripin e Gazës nga ajri dhe toka, ka vendosur një rrethim dhe ka ndërmarrë një ofensivë tokësore në hakmarrje të sulmit ndërkufitar nga Hamasi më 7 tetor.
Të paktën 18.608 palestinezë janë vrarë dhe më shumë se 50.100 të tjerë janë plagosur në sulmet izraelite që atëherë.
Burimi: AA