Një "histori shqiptare"!/Nga i hetuar për kultivim droge, në krye të antidrogës së durrësit
Mbrëmjen e së enjtes u vu në pranga shefi i Antidrogës së Policisë së Durrësit, i cili rezulton të jetë me gradën e kryekomisarit.E jo vetëm aq, por i prangosuri me urdhër të SPAK është hetuar sipas prokurorisë, edhe 3 vjet më parë pikërisht për lejim të parcelave me kanabis. Aso kohe, Gazmir Preçi ishte me shërbim në Mallakastër, ndërsa më pas u ngrit në detyrë dhe u bë shef i sektorit të Antitrafiqeve në Drejtorinë e Policisë së Durrësit.Edhe pse Prokuroria e Posaçme ende nuk ka dhënë detaje në lidhje me hetimin, ndërkohë që ditën e sotme pritet të dalë për masë sigurimi në gjykatë.
Preçi, sipas policisë, ka shpërdoruar detyrën. Ai kërcënoi me vënie gjobe pronarin e një lokali nate në afërsi të Urës së Dajlanit në Durrës, duke i kërkuar 20 mijë euro, thotë AMP, agjencia që mbikëqyr dhe heton policinë.
Ndonëse ende nuk dihet se cili është motivi i asaj gjobëvënieje që, sipas AMPsë, Preçi e ka kërcënuar me mbyllje aktiviteti pronarin e klubit të natës. Për arrestimin, reagoi edhe ministri i Brendshëm, ku për herë të parë u shfaq me një deklaratë ditën e djeshme, teksa tha se do të ndëshkohen të gjithë policët që janë ‘padronë’!
HETIMI NË VITIN 2021
Tre vjet më parë, Gazmir Preçi, i cili atëherë mbante postin e shefit të Krimeve në Policinë e Mallakastrës u arrestua së bashku me 4 zyrtarë të tjerë të Policisë së Fierit, në kuadër të një hetimi për lejimin e kultivimit të kanabisit në afërsi të Urës së lumit Vjosë, në Poçem të Mallakastrës. Preçi u vu në hetim për “Shpërdorim detyre” për lejimin e kultivimit të kanabisit.
Sipas dosjes, në afërsi të Urës së lumit Vjosë, në Poçem të Mallakastrës, u evidentuan disa parcela të kultivuara me bimë narkotike. Në dosjen që u referua atëherë punonjësit e policisë ishin në hetim për shpërdorim detyre gjatë periudhës qershor-shtator 2021 duke lejuar, apo favorizuar veprimtarinë kriminale të disa shtetasve të arrestuar më parë nga Prokuroria e Rrethit Fier për kultivim të bimëve narkotike. Ndaj tij dhe 2 punonjësve të tjerë të policisë gjykata e Fierit vendosi masën e sigurisë “detyrim me paraqitje”.
E pikërisht dyshimet dhe problematikat në Mallakastër jo shumë vite më parë, nuk ndikuan që Gazmir Preçi të ngjitej në karrierë, duke “u shpërblyer” me post si shef i Antidrogës në Durrës. Hetimet u bënë në bashkëpunim në me Agjencinë e Mbikëqyrjes Policore fill pas denoncimit të pronarit të lokalit “Night”, një klub nate te Ura e Dajlanit.
Sipas denoncimit të tij, shefi i Antidrogës e kërcënonte se do i mbyllte biznesin me pretendimin se kishte të punësuar disa persona të pasiguruar, çka nuk është në kompetencën e tij për ta kontrolluar. Shuma prej 10 mijë eurosh u mor në një takim nën vëzhgimin e hetuesve mes pronarit të lokalit dhe Gazmir Preçit në një lagje të Tiranës, i cili ra në grackën e kolegëve sapo mori një pjesë të parave. Kryekomisari akuzohet për “Shpërdorim detyre” dhe “Korrupsion pasiv”.
Në një reagim ministri i Brendshëm, Ervin Hoxha, tha se operacioni ishte mesazhi është i qartë për policët që hiqen si padronë të qytetarëve dhe bizneseve. Ata do marrin ndëshkimin më të ashpër ligjor!/beratitv