Demokracia "mbaron" këtu!/SHBA, studentët propalestinezë do t'i presin masa më të rrepta në vitin e ri akademik
Pas demonstratave në mbështetje të Palestinës, të cilat nisën në Universitetin Columbia në SHBA në mesin e muajit prill dhe u përhapën në shumë universitete në mbarë botën, vatrat akademike kanë filluar të marrin masa më të rrepta në semestrin e ri, raporton Anadolu.Pasi mijëra studentë në SHBA, të cilët kundërshtonin mbështetjen financiare të universiteteve të tyre për kompanitë që mbështesin pushtimin e Gazës nga Izraeli, zhvilluan demonstrata pavarësisht ndërhyrjeve policore duke ngritur tenda në kopshtet e universiteteve nga mesi i prillit deri në ditën e diplomimit, çështja është bërë temë aktuale e administratave të universiteteve në vitin e ri akademik.
Korrespondenti i AA-së ka përpiluar masat e marra nga shumë administrata të kolegjeve dhe universiteteve në lidhje me të drejtat e tubimit dhe protestës në kampuse, duke dashur të parandalojnë përsëritjen e demonstratave në mbështetje të Palestinës që çuan në arrestimin e mijëra studentëve.
- Universiteti Columbia
Kopshti ku u ngritën kampet e protestës në kampusin e Universitetit Columbia, që ishte pikënisja e demonstratave në mbështetje të Gazës në universitetet në SHBA, është rrethuar me gardh teli.
Në e-mailin dërguar studentëve në korrik, administrata e universitetit njoftoi se po planifikonte të zbatonte një "sistem kampusi të koduar me ngjyra" që kufizon qasjen në aktivitetet brenda kampusit.
Thuhet po ashtu se në fillim të gushtit, administrata e universitetit ka bërë plane për të sjellë "oficerë të qetësisë" me autoritetin për arrestime, krahas 290 pjesëtarëve të personelit të sigurisë në kampus.
- Universiteti i Virginias
Administrata e Universitetit të Virginias ka njoftuar se në kuadër të vendimeve të saj të reja, asnjë aktivitet në natyrë nuk do të lejohet ndërmjet orës 02:00 dhe 06:00.
Administrata e universitetit ka deklaruar se asnjë tendë që nuk përdoret në aktivitetet shkollore nuk mund të qëndrojë në mjediset e shkollës për më shumë se 18 orë dhe se gjumi në kampus është i ndaluar nga mesnata deri në orën 06:00.
Gjithashtu thuhet se personat që mbajnë maska brenda universitetit duhet të paraqesin të dhënat e tyre të identitetit nëse kërkohet nga zyrtari i universitetit.
- Universiteti i Pennsylvanias
Administrata e Universitetit të Pennsylvanias ka njoftuar se kampet dhe demonstratat e natës janë të ndaluara brenda kufijve të universitetit "për të garantuar sigurinë e studentëve dhe stafit" dhe gjithashtu ka deklaruar se demonstratat nuk lejohen në objektet universitare si zyra, muze dhe biblioteka.
Duke shpjeguar se ngjarjet e planifikuara për t'u mbajtur në kampus duhet të njoftohen të paktën 48 orë përpara, administrata e universitetit deklaroi se pajisjet me zë të lartë, si megafonët, mund të përdoren vetëm midis orës 17:00 dhe 22:00 gjatë javës kur vazhdojnë mësimet.
Administrata e universitetit ka njoftuar se posterët, tabelat dhe pankartat duhet të hiqen jo më vonë se dy javë pasi të jenë varur dhe ka thënë se materialet e patretshme në ujë, gjysmë të përhershme dhe të përhershme, përfshirë spërkatësit, nuk do të lejohen të përdoren në universitet.
- Universiteti "Case Western Reserve"
Universiteti "Case Western Reserve" ka njoftuar se duhet marrë leje me shkrim nga administrata për demonstrime më të mëdha se 20 persona dhe që kalojnë kohëzgjatjen prej dy orësh.
Administrata e universitetit ka vendosur që demonstratat duhet të mbahen nga ora 08:00 deri në 20:00, duke shtuar se nuk lejohet përdorimi i lëndëve plasëse si fishekzjarrë, vendosja e tendave dhe projektimi i imazheve dhe videove në ndërtesa.
- Shoqata Amerikane e Profesorëve të Universiteteve dënoi masat e marra
Nga ana tjetër, Shoqata Amerikane e Profesorëve Universitarë (AAUP) dënoi politikat e shtypjes së protestave paqësore të universiteteve.
Duke theksuar se masat e marra cenojnë lirinë e shprehjes dhe dekurajojnë studentët dhe akademikët që të marrin pjesë në protesta dhe demonstrata, AAUP theksoi se shumica e këtyre vendimeve janë vendosur në mënyrë të njëanshme nga administratat e universiteteve pa marrë mendimet e anëtarëve të fakulteteve./AA