“Pa fëmijët, as bukë s’hamë dot”- Pensionistët në protestë përpara Kryeministrisë
Pensionistët kanë zhvilluar këtë të mërkurë një protestë përpara Kryeministrisë, duke kërkuar rritje të pensioneve. Të mbledhur jo vetëm nga Tirana, por dhe nga rrethet të moshuarit deklarojnë se përballimi i kostove minimale të jetesës është bërë i pamundur me pensionet aktuale, të cilat nuk përputhen me rritjen e çmimeve dhe krizën ekonomike. “Nuk arrijmë dot të blejmë ilaçet. Kam 5 vjet që nuk kurohem pasi nuk arrij dot t’i paguaj ilaçet. Shyqyr që na ka fal Zoti fëmijë se ne jemi të mbaruar.
4 mijë lekë rritje çfarë është, nuk blen dot as çerek kilogramë djath. Ne kemi nevojë për shërbimin shëndetësor dhe ushqim i cili nuk përballohet. Janë shumë të larta ushqimet, më të shtrenjta këtu se në Itali”, tha një pesnioniste.
Protestuesit theksuan se shpenzimet e tyre për ushqim, ilaçe dhe faturat e energjisë janë rritur ndjeshëm, duke i lënë në kushte shumë të vështira ekonomike. Disa prej tyre u shprehën se jetojnë me të ardhura të pamjaftueshme dhe kërkuan që qeveria të marrë masa të menjëhershme për të rritur pensionet dhe për të lehtësuar situatën e tyre financiare.
“Pensioni që marrim nuk na mbulon as nevojat më themelore. Jemi të detyruar të zgjedhim mes ushqimit dhe ilaçeve,” tha një prej pensionistëve në protestë.
Pensionistët kërkojnë që qeveria të përfshijë rritjen e pensioneve në buxhetin e ardhshëm, duke i përshtatur ato me rritjen e kostove të jetesës dhe inflacionit./EN