Grupi i parë i palestinezëve të plagosur dhe pacientëve largohen nga Gaza për trajtim mjekësor në Egjipt
Grupi i parë i palestinezëve dhe pacientëve të plagosur u largua nga Rripi i Gazës përmes pikës kufitare Rafah për t’iu nënshtruar trajtimit mjekësor në Egjipt. Dalja e tyre shënon ditën e parë të hapjes së vendkalimit Rafah në përputhje me marrëveshjen e armëpushimit që hyri në fuqi më 19 janar. Sipas korrespondentit të Anadolus, autobusët dhe ambulancat që transportonin të plagosur, pacientë dhe shoqëruesit e tyre u larguan nga ana palestineze e vendkalimit Rafah duke u drejtuar në anën egjiptiane të pikës kufitare.
Më herët, Mohammed Zaqout, drejtori i spitaleve pranë Ministrisë së Shëndetësisë së Gazës, tha se grupi i parë përfshin 50 fëmijë të plagosur dhe të sëmurë.
Ai, megjithatë, nuk dha detaje mbi mekanizmin e trajtimit të tyre mjekësor në spitalet e Ministrisë egjiptiane të Shëndetësisë.
Më parë, Ministria palestineze e Shëndetësisë konfirmoi se kalimi do të hapej të shtunën për grupin e parë të të plagosurve që do të largoheshin nga Gaza.
Kalimi Rafah, një rrugë jetike për ndihmën humanitare në Gaza, ishte i mbyllur që nga maji 2024 pas ofensivës tokësore të Izraelit në qytetin jugor Rafah.
Kalimi po mbikëqyret nga një forcë ndërkombëtare nga Bashkimi Evropian (BE) dhe drejtohet nga palestinezë nga Autoriteti Palestinez me bazë në Ramallah.
Më 19 janar hyri në fuqi një marrëveshje armëpushimi dhe shkëmbimi i të burgosurve ndërmjet Hamasit dhe Izraelit, e cila fillimisht është planifikuar të zgjasë 42 ditë.
Lufta gjenocidale e Izraelit ka vrarë më shumë se 47.400 palestinezë, shumica prej tyre gra dhe fëmijë, dhe ka plagosur më shumë se 111.000 që nga 7 tetori 2023.
Sulmet izraelite në Gaza kanë lënë më shumë se 11,000 njerëz të zhdukur, shkatërrim të gjerë dhe një krizë humanitare që ka marrë jetën e shumë të moshuarve dhe fëmijëve në një nga fatkeqësitë më të këqija humanitare globale.
Gjykata Ndërkombëtare Penale lëshoi urdhra arresti në nëntor të vitit të kaluar për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavë./AA