"Mjekët Kundër Gjenocidit" i bëjnë thirrje Senatit amerikan të ndalojë gjenocidin në Gaza
Koalicioni botëror i punonjësve shëndetësorë "Mjekët Kundër Gjenocidit" (Doctors Against Genocide-DAG) i ka bërë thirrje Senatit amerikan që të ndërmarrë veprime për t'i dhënë fund gjenocidit në Rripin e Gazës. "Ne jemi këtu në Senat për të kërkuar që ata të bëjnë punën e tyre", tha për Anadolu dr. Nidal Jboor, bashkëthemelues i asociacionit DAG. Koalicioni global i punonjësve shëndetësorë ka mobilizuar mbi 100 mjekë dhe profesionistë të tjerë shëndetësorë në Capitol, duke bërë thirrje edhe për rikthimin e financimit të Agjencisë së OKB-së për Refugjatët Palestinezë (UNRWA).
Jboor tha se DAG i bën thirrje Senatit që të pranojë dhe miratojë dy rezoluta.
"Rezoluta nr. 68 e Senatit paralajmëron kundër përfshirjes së SHBA-së, kundër vendosjes së forcave amerikane në Gaza, duke e konsideruar si joligjore zhvendosjen me forcë të palestinezëve. SHBA nuk duhet të përfshihet në këtë. Rezoluta gjithashtu thekson të drejtën e popullit palestinez, si të gjithë popujt në botë, për vetëvendosje. Pra, ne u bëjmë thirrje senatorëve që të nënshkruajnë bashkë këtë rezolutë", shtoi ai.
Jboor shtoi se rezoluta tjetër synon të rikthejë financimin për UNRWA-në.
"Ne e dimë se për këtë do të ketë një votim në Senat dhe u bëjmë thirrje të gjithë senatorëve të punojnë për të rivendosur fondet për UNRWA-në, sepse UNRWA ofron 70 për qind të kujdesit parësor shëndetësor në Gaza", tha ai, duke shtuar se roli i agjencisë është "shumë vendimtar".
UNRWA, e themeluar në vitin 1949, ofron shërbime shëndetësore, arsimore dhe sociale për refugjatët palestinezë në Bregun Perëndimor të pushtuar, Kudsin Lindor, Liban, Jordani dhe Gaza.
Megjithatë, Izraeli muajin e kaluar urdhëroi agjencinë të mbyllte të gjitha operacionet e saj në Kudsin Lindor.
Shefi i UNRWA-së, Philippe Lazzarini, ka theksuar vazhdimisht se agjencia është "shtylla kurrizore" e reagimit humanitar në Gaza.
- "SHBA duhet të vazhdojë financimin e agjencisë së OKB-së për refugjatët palestinezë"
"UNRWA është organizata më e madhe në terren. Ata e kanë bërë këtë për 70-80 vjet dhe ne mendojmë se asnjë organizatë tjetër nuk është e pajisur për të bërë punën që ata bëjnë. Ne po i bëjmë thirrje qeverisë së Shteteve të Bashkuara dhe Senatit të miratojnë rezolutën për të rivendosur financimin e kësaj organizata", tha Jboor.
Ai shtoi se DAG po punon gjithashtu për të futur një rezolutë të re që kërkon "mbrojtjen absolute" të punonjësve dhe institucioneve shëndetësore në mbarë botën, përfshirë Gazën.
"Ne mendojmë se institucionet shëndetësore janë vende të shenjta, ato nuk duhet të jenë asnjëherë shënjestër, me asnjë justifikim. Ne po përpiqemi të gjejmë një senator që do ta mbështesë këtë rezolutë, do ta propozojë për votim dhe ajo të bëhet ligji i ri, këtu në Shtetet e Bashkuara dhe në mbarë botën", theksoi ai.
James C. Cobey, një kirurg ortoped, tha për Anadolu se për herë të parë shkoi në Gaza në vitin 1964 si vullnetar me UNRWA-në, ku kaloi tre muaj duke u kujdesur për fëmijët e dehidruar. Ai shprehu dëshirën e tij për t'u kthyer në enklavën e rrethuar.
"Unë jam këtu sot për të bërë thirrje që qeveria të ndalojë financimin e Izraelit dhe të jem i sigurt se do të financojë UNRWA-në. UNRWA duhet të financohet. Është një burim jete", tha Cobey, i cili gjithashtu ndau Çmimin Nobel për Paqen në 1997 për aktivizmin e tij në kuadër të fushatës ndërkombëtare për ndalimin e minave tokësore.
Ai tha se fëmijët po vdesin për shkak të mungesës së ushqimit dhe bëri thirrje që SHBA të ndalojë të gjithë financimin e armëve për Izraelin.
"SHBA duhet të vazhdojë financimin e UNRWA-së", shtoi ai.
Emad Abou-Arab, një mjek familjar, tha se po i bëjnë presion Senatit që të miratojë rezoluta për të vazhduar me financimin e UNRWA-së.
Muajin e kaluar, DAG ishte gjithashtu në ndërtesën e Senatit, duke i kërkuar administratës së atëhershme Biden të ndalonte ndihmën për Izraelin, pasi forcat izraelite arrestuan kolegët e tyre në Gaza, duke përfshirë Dr. Hussam Abu Safiya, drejtorin e spitalit Kamal Adwan.
Kur u pyet se çfarë ka ndryshuar që nga muaji i kaluar, Abou-Arab tha se shumë kanë ndryshuar, përveç luftës për një Palestinë të lirë dhe luftës kundër gjenocidit në Gaza.
"Ne duhet të vazhdojmë të luftojmë. Dhe fuqia është lart në këto zyra dhe kjo është arsyeja pse ne jemi këtu sot", tha ai.
Që nga 19 janari, në Gaza është në fuqi marrëveshja e armëpushimit dhe shkëmbimit të të burgosurve, duke ndalur luftën gjenocidale të Izraelit që ka vrarë të paktën 48.300 palestinezë, si dhe e ka lënë enklavën në gërmadha.
- "Akoma ka shumë njerëz që vdesin nga bombardimet aktive, sëmundjet"
Adlah Sukkar, një mjeke pulmonologe, tha për Anadolu se pavarësisht armëpushimit, vdekjet vazhdojnë.
"Ne ende po shohim shumë, shumë, njerëz që vdesin jo vetëm nga bombardimet aktive, por nga sëmundjet dhe vdekjet e parandalueshme, nga mungesa e qasjes bazë në gjëra si ilaçet, uji i pastër, gjëra të kësaj natyre", tha Sukkar, duke shtuar:
"Pra, ne kemi ende një sasi të madhe pune për të bërë nga perspektiva e kujdesit shëndetësor".
Toke Odimayomi, një mjeke e urgjencës pediatrike, tha se ajo e kupton se si është të shohësh një fëmijë të amputuar ose të gjakosur.
Odimayomi tha për Anadolu se një punë e tillë është jashtëzakonisht e vështirë pa furnizime mjekësore.
"Nuk mund t'i imagjinoj kolegët e mi në Gaza të ushtrojnë detyrën në rrethanat që ata po e bëjnë këtë", tha ajo.
Ajo theksoi se të gjithë meritojnë qasje në ushqim, ilaçe, ujë dhe kujdes shëndetësor bazë.
"Pra, kjo është arsyeja pse unë jam duke qëndruar këtu sot, për të qëndruar me njerëzit në Gaza dhe në mbarë botën që po përballen me gjenocidet", shtoi ajo.
Në nëntor, Gjykata Ndërkombëtare Penale lëshoi urdhrarreste për kryeministrin izraelit Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli po përballet gjithashtu me padi për gjenocid në Gjykatën Ndërkombëtare të Drejtësisë për luftën e tij në enklavë./AA