Kryeministrja italiane: Situata në Gaza dramatike, ushtria nuk mund të justifikojë sulmet ndaj civilëve
Thursday, 24 July 2025 13:41
“Të gjithë jemi të angazhuar për të siguruar që armiqësitë të ndalen dhe që të rifillojë një proces serioz drejt zgjidhjes me dy shtete”. Kryeministrja e Italisë, Giorgia Meloni, e ka përshkruar situatën në Rripin e Gazës si “dramatike,” si dhe ka theksuar se “asnjë veprim ushtarak nuk mund të justifikojë sulmet ndaj civilëve” dhe inkurajoi përpjekjet e reja drejt paqes. “Të gjithë jemi të angazhuar për të siguruar që armiqësitë të ndalen dhe që të rifillojë një proces serioz drejt zgjidhjes me dy shtete”, tha Meloni gjatë një konference për media në Romë me presidentin algjerian, Abdelmadjid Tebboune.
Agjencia italiane ANSA raportoi se deklaratat u bënë gjatë samitit të pestë ndërqeveritar mes Italisë dhe Algjerisë.
Presidenti Tebboune, nga ana e tij, mbështeti shqetësimet e kryeministres Meloni, duke i bërë thirrje fuqive botërore të marrin hapa vendimtarë.
“Koha është që komuniteti ndërkombëtar të marrë përgjegjësinë për të ndalur armiqësitë ndaj popullit palestinez”, tha ai.
Që nga tetori i vitit 2023, Izraeli në Rripin e Gazës ka vrarë të paktën 59.200 palestinezë, shumica prej tyre gra dhe fëmijë.
Fushata ushtarake ka shkatërruar enklavën, ka shembur sistemin shëndetësor dhe ka shkaktuar mungesë të madhe ushqimi./AA