Zelensky nesër në Turqi: “Stambolli është çelësi i paqes”- Rusia bojkoton bisedimet!
Presidenti ukrainas Volodymyr Zelenskyy do të vizitojë nesër Turqinë, ku priten bisedime intensive për ringjalljen e negociatave që synojnë t’i japin fund luftës Ukrainë–Rusi. “Po përgatitemi të rigjallërojmë negociatat dhe kemi gati propozime konkrete që do t’ua paraqesim partnerëve tanë,” deklaroi Zelenskyy. Ai theksoi se objektivi kryesor i Kievit mbetet mbyllja e luftës dhe rifillimi i shkëmbimit të të burgosurve të luftës. Në bisedimet e Stambollit pritet të marrë pjesë edhe i dërguari special presidencial i SHBA-së, Steve Witkoff, i cili do të mbërrijë në Turqi për takime të drejtpërdrejta me Zelenskyyn.
Por Moska nuk do të jetë në tryezë.
Zëdhënësi i Kremlinit, Dmitry Peskov, konfirmoi se Rusia nuk do të marrë pjesë në bisedimet e 19 nëntorit. “Deri tani, këto kontakte kanë ndodhur pa pjesëmarrjen e Rusisë. Do të presim informacion mbi përmbajtjen e bisedimeve të Stambollit,” u shpreh ai.
Mungesa e Rusisë në këto takime e vendos Turqinë dhe partnerët perëndimorë në qendër të një përpjekjeje të re diplomatike, ndërsa Ukraina synon të shtyjë përpara një agjendë të re paqeje dhe lirimin e të burgosurve të saj.