Kryediplomatja e Afrikës së Jugut kërcënohet me jetë për shkak të rastit të denoncimit të izraelit në Gjykatën Ndërkombëtare të Drejtësisë
Ministrja e Punëve të Jashtme e Afrikës së Jugut, Naledi Pandor, ka bërë të ditur se ajo ka marrë mesazhe kërcënuese që kur vendi i saj ngriti një çështje për gjenocid kundër Izraelit në Gjykatën Ndërkombëtare të Drejtësisë, transmeton Anadolu. Duke folur mbrëmë me gazetarët në Cape Town, Pandor tha se kishte folur me ministrin e Policisë Bheki Cele për këtë çështje.
"Kam folur me ministrin Cele për shkak të mesazheve të ndryshme që po marr dhe ndjeva se ishte më mirë të kishim siguri shtesë", tha ajo, duke shtuar se ishte më e shqetësuar për familjen e saj sepse në disa nga mesazhet e mediave sociale janë përmendur fëmijët e saj.
Sipas Pandor, agjencia e inteligjencës izraelite përdor kërcënime për të frikësuar ata që kanë një qëndrim kundër shtypjes.
"Njerëzit e botës dhe Palestinës nuk u tërhoqën kur shteti i aparteidit (në Afrikën e Jugut) ishte në gjendjen më të keqe. Ata qëndruan me ne në lëvizjen çlirimtare. Pra, ne nuk mund të qëndrojmë prapa tani", tha ajo.
"Ne duhet të jemi me palestinezët dhe një nga gjërat që nuk duhet të lejojmë është dështimi i guximit", shtoi ajo.
Kjo nuk është hera e parë që Pandor flet për kërcënime ndaj saj dhe familjes së saj.
Muajin e kaluar, në një konferencë për media në zyrën e saj në kryeqytetin Pretoria, ajo tha se kishte marrë kërcënime dhe abuzime, pasi disa e kanë quajtur atë një anëtare të grupit terrorist DEASH dhe një adhuruese të Hamasit./Nga AnadoluA