Mbretëri e Bashkuar, dënohet me 10 muaj burg personi që ofendoi dhe pështyu shoferin musliman të autobusit
Një person është dënuar me 10 muaj burg në Mbretërinë e Bashkuar për abuzim racor dhe për shkak se pështyu një shofer të autobusit për shkak se ishte musliman, transmeton Anadolu.Në një deklaratë të lëshuar të martën, Shërbimi i Prokurorisë së Kurorës (CPS) tha se 39-vjeçari Michael Mongan "bëri disa ofendime raciste dhe pështyu shoferin pasi iu refuzua hyrja për shkak se kartela e tij e pagesës iu refuzua" më 7 gusht në Hayes.Në pamjet që u bënë virale në mediat sociale javën e kaluar, personi shihet duke pështyrë shoferin dhe duke bërë ofendime islamofobike, duke bërtitur vazhdimisht "terrorist musliman" dhe duke përdorur shpifje. Ai gjithashtu këmbënguli që shoferi të zbriste nga autobusi teksa godiste ekranin e tij mbrojtës.
Ai u identifikua dhe u arrestua më 9 gusht.
"Veprimet e tij kanë qenë të lidhura me skenat e fundit të trazirave pasi policia dhe prokurorët besojnë se Mongan u trimërua në veprimet e tij nga incidentet e trazirave të dhunshme që ndodhën në të gjithë vendin", tha CPS.
Incidenti ndodhi në një kohë kur Britania e Madhe është në trazira për ditë të tëra, me protestuesit e dhunshëm të së djathtës ekstreme që shënjestrojnë muslimanët, grupet minoritare dhe emigrantët.
Trazirat u nxitën nga pretendimet e rreme të përhapura në internet se i dyshuari i arrestuar për therjen fatale me thikë të tre fëmijëve më 29 korrik në Southport ishte një azilkërkues musliman.
Autoritetet që atëherë e kanë identifikuar sulmuesin si Axel Rudakubana, një adoleshent 17-vjeçar i lindur në Cardiff nga prindër ruandazë, por nuk ka penguar turmat e ekstremit të djathtë./AA