I lidhur me aferën e spitaleve publike në Maltë, nën hetim shefi i zinxhirit spitalor të falimentuar në SHBA
Sistemi spitalor “Steward” ishte në një gjendje kaq të rëndë përpara falimentimit të tij, saqë administratorët e spitalit të tij çdo javë ishin në kërkim të parave dhe furnizimeve për të mbajtur objektet në funksion.Ndërkohë që humbte qindra milionë dollarë në vit, “Steward” i pagoi të paktën 250 milionë dollarë shefit të saj ekzekutiv, Dr. Ralph de la Torre, dhe kompanive të tjera të tij gjatë katër viteve që ai ishte pronari kryesor i zinxhirit të spitaleve.“Steward” paraqiti falimentimin në maj, duke u bërë një nga dështimet më të mëdha spitalore në dekada. Kushtet në disa nga spitalet e saj u kthyen në katastrofë. Në një spital në Florida, një kompani që merrej me pastrimin e brejtësve gjeti mbi 3 mijë lakuriqë nate vitin e shkuar.
Këtë muaj në Phoenix, ku temperaturat arritën në 38 gradë, ajri i kondicionuar u prish në një spital “Steward”, duke detyruar pacientët të transferoheshin diku tjetër, sipas një dosjeje gjyqësore. Gjithashtu, kuzhina është mbyllur për shkak të shkeljeve të kodit shëndetësor. Shteti javën e kaluar urdhëroi spitalin të ndërpresë operacionet.
Falimentimi i “Steward” ka tërhequr vëmendjen e qeverisë. Një komitet i Senatit ka nisur një hetim dhe ka thirrur de la Torren për të dëshmuar muajin e ardhshëm.
Muajin e kaluar, në ditën kur “Steward” tha se do mbyllte dy spitale në Massachusetts, de la Torre ishte në Francë për të marrë pjesë në garat e kuajve në Lojërat Olimpike të Parisit.
Ish-kirurgu i zemrës zotëron një jaht 60 metra të quajtur “Amaral” me vlerë 40 milionë dollarë dhe një varkë peshkimi sportive 15 milionë dollarëshe, sipas komitetit të Senatit. Ai zotëron një rezidencë 11,108 metra katrorë në Dallas, e vlerësuar në 7.2 milionë dollarë. Banorë të tjerë të lagjes së tij ekskluzive përfshijnë George W. Bush dhe Mark Cuban.
Ai pagoi të paktën 7.2 milionë dollarë në vitin 2022 për një fermë prej 500 hektarësh 60 kilometra në jug në Waxahachie, sipas aktit të pronës. Dy avionë privatë që i njëjti komitet i Senatit vlerësoi në 95 milionë dollarë ishin në pronësi të një filiali “Steward”, shumicën e akioneve të të cilit i ka de la Torre.
Guvernatorja e Massachusetts Maura Healey bëri thirrje që de la Torre të hetohej në mënyrë federale. “Ai në thelb vodhi miliona nga “Steward” në kurrizin e punëtorëve dhe pacientëve dhe i bleu vetes jahte të bukura, pallate dhe tani me sa duket udhëtime luksoze në Versajë,” tha Healey.
De la Torre nuk pranoi të intervistohej. Ai tha në një deklaratë se dy varkat vlejnë më pak se sa tha komiteti i Senatit.
“Këto vlera janë dukshëm të fryra,” tha ai.
Një zëdhënëse e de la Torre tha se “ai ishte në një pushim familjar që ishte planifikuar dhe paguar vitin e kaluar” kur u njoftua mbyllja e spitalit.
Dikur një kirurg i njohur, de la Torre u bë shef ekzekutiv i paraardhësit të “Steward” në vitin 2008 dhe mori përsipër pronësinë e shumicës së “Steward” nga pronari i tij i kapitalit privat në vitin 2020.
De la Torre mund të ishte “bërë një nga kirurgët më të njohur të zemrës në botë”, tha Paul Levy, i cili ishte shef ekzekutiv në Qendrën Mjekësore “Beth Israel Deaconess” në Boston kur de la Torre punonte atje.
“Por ai kishte ambicien të ishte diçka ndryshe dhe diçka ndryshe ishte të bëhej i pasur dhe i famshëm dhe një sukses i madh komercial.”
Zëdhënësja e De la Torre tha, “Dr. de la Torre fitoi më shumë para si kirurg zemre sesa në vitet e tij të para si shef ekzekutiv i korporatës.
Disa kolegë dhe ish-kolegë thanë se de la Torre, një i diplomuar në Shkollën Mjekësore të Harvardit, është brilant dhe simpatik, por edhe dominues, duke kërkuar besnikëri absolute. Disa thanë se e panë atë duke bërtitur dhe sharë ndaj njerëzve që nuk pajtoheshin me të.
“Do ishte vetëvrasje në karrierë ta merrje atë në një takim publik,” tha një person që ka punuar për de la Torre në “Steward”.
“Ai nuk donte të dëgjonte pikëpamje apo mendime të shumta. Ai donte që njerëzit të pajtoheshin me idenë e tij dhe në thelb thjesht të vazhdonin përpara.”
Dr. Michael Callum, një mik prej gati 30 vitesh, i cili është një drejtues i lartë drejtues dhe anëtar bordi, tha se de la Torre është i ashpër dhe pasionant, por se ai kurrë nuk e pa atë të shante askënd.
“Unë do thosha se mendoj se Ralph është keqtrajtuar rëndë kohët e fundit,” tha Callum.
“Steward” është përpjekur të shesë 30 spitalet që operonte në tetë shtete. Dy spitalet në Masaçusets nuk kanë arritur të marrin oferta të kualifikuara.
250 milionë dollarët në pagesat nga “Steward” për de la Torre dhe për bizneset e tij bazohen në zbulimet publike nga “Steward” ose kompanitë me të cilat ai merrej.
Totali ka të ngjarë të nënvlerësojë shifrën e plotë, sepse zbulimet e gjykatës për falimentimin e “Steward” në shumicën e rasteve kanë mbuluar vetëm 12 muajt përpara se kompania të paraqitej për falimentim. Disa nga 250 milionë dollarët iu paguan de la Torres drejtpërdrejt. Pagesat e tjera ishin për kompanitë që bënin biznes me “Steward” ku ai kishte aksione të mëdha pronësie.
De la Torre mori shumicën e aksioneve në “Steward” në vitin 2020 kur pronari i kapitalit privat të kompanisë, “Cerberus Capital Management”, transferoi 90% të aksioneve te një grup mjekësh që ai drejtonte, në këmbim të një premtimi prej 350 milionë dollarësh.
Vitin e ardhshëm, ndërsa kompania luftoi financiarisht gjatë pandemisë Covid-19, “Steward” shpërndau 111 milionë dollarë për aksionerët e saj. Një rishikim i dosjeve publike dhe të dhënave të brendshme të “Steward” tregon se de la Torre zotëronte rreth 73% të kompanisë, duke nënkuptuar që pjesa e tij e shpërndarjes ishte rreth 81 milionë dollarë. Më vonë atë vit, de la Torre bleu jahtin e tij prej 40 milionë dollarësh.
Zëdhënësja e De la Torre tha se ai mori paratë për të shlyer pjesërisht një hua tek një filial i “Steward” që ai e kishte garantuar personalisht.
Financat e “Steward” u përkeqësuan pas kësaj. Deri në fund të vitit 2021, detyrimet e “Steward” tejkaluan aktivet e tij me 2 miliardë dollarë, krahasuar me një deficit prej 1.5 miliardë dollarësh një vit më parë. “Steward” humbi 365 milion dollarë në 2021 dhe 269 milion dollarë në 2022, sipas pasqyrave financiare të “Steward” të pazbuluara më parë të shikuara nga The Wall Street Journal.
Një pagesë tjetër erdhi në vitin 2022, kur Steward shiti një biznes të kujdesit shëndetësor që zotëronte te “CareMax”, një kompani publike, në një marrëveshje parash dhe aksionesh. “Steward” transferoi 99 milionë dollarë të aksioneve që mori në një kompani në pronësi të de la Torre, sipas zbulimeve të “CareMax”. Kjo ishte pjesa më e madhe e aksioneve që pagoi “CareMax”. Që nga marrëveshja, aksionet e “CareMax” janë ulur 98%. Regjistrimet e “CareMax” tregojnë se de la Torre nuk ka shitur asnjë aksion.
“Steward” bëri gjithashtu pagesa për dy nga kompanitë e tjera të de la Torre. Ajo po paguante një firmë këshilluese menaxheriale, në pronësi të tij, me një normë prej 30 milionë dollarë në vit, tregon një dosje në gjykatën e falimentimit.
“Steward” tha se firma “Management Health Services”, punësonte 16 njerëz, duke përfshirë drejtuesit e “Steward”. Kompania tha se ata “sigurojnë mbikëqyrje ekzekutive dhe direktivë të përgjithshme strategjike”. “Steward” pagoi në mënyrë efektive firmën e shefit të saj, e cila punësonte drejtuesit e “Steward”, për shërbimet e menaxhimit ekzekutiv për “Steward”.
Zëdhënësja e De la Torre tha se të vetmet pagesa që ai mori nga MHS ishin për pagën. Por ajo zotëronte gjithashtu asete të forta, duke përfshirë dy avionët privatë, sipas RZJets, e cila gjurmon historinë e avionëve. Njëri, një “Bombardier Global 6000”, vlerësohej në 62 milionë dollarë, sipas panelit të Senatit, ndërsa tjetri, një “Dassault Falcon 2000LX”, kishte vlerë 33 milionë dollarë. Pilotët ishin në listën e pagave të MHS, sipas njerëzve të njohur me këtë çështje. Të dy avionët u shitën këtë vit.
“Steward” gjithashtu i ka paguar 37 milionë dollarë një kompanie të quajtur CREF nga maji 2023 deri në maj 2024, sipas një depozitimi në gjykatën e falimentimit. CREF është 40% në pronësi të de la Torre, sipas njerëzve të njohur me këtë çështje, dhe ofron shërbime të administrimit të pasurive të paluajtshme dhe objekteve. 60% tjetër është në pronësi të themeluesit dhe CEO të CREF, Robert Gendron, i cili ishte nënkryetar ekzekutiv i “Steward” nga viti 2018 deri në 2022, përgjegjës për pasuritë e paluajtshme dhe objektet.
Një zëdhënës i CREF tha se de la Torre investoi për herë të parë në CREF në 2021 dhe se kompania “ka ofruar shërbime të cilësisë më të lartë për spitalet “Steward”, siç përpiqet të bëjë për të gjithë klientët e saj”.
Regjistrimi i “Steward” nuk thoshte se sa pagoi CREF në periudhat e mëparshme. Zëdhënësja e De la Torre tha se CREF nuk i bëri atij pagesa në para.
Levy, ish-shefi i de la Torre, tha që në ditët e para të “Steward” tha se spitalet shpenzonin shumë, duke përfshirë mjekët e njohur dhe reklamat. De la Torre financoi një shtrirje kombëtare duke shitur pasurinë e paluajtshme të “Steward” te një pronar i madh spitalesh, “Medical Properties Trust”, duke e lënë “Steward” me pagesa të majme qiraje.
Stili i jetesës së De la Torre u shtri në botën e sporteve të kuajve. Gruaja e tij, Nicole Acosta, 29 vjeçe, konkurron mbi kalin e saj, Dante SPH, dhe stërvitet në një pistë poshtë rrugës nga ferma në Waxahachie. Nuk mund të përcaktohet se sa kanë paguar për kalin, por ai u shit në ankand në vitin 2014 tek një çift rus për 2.8 milionë euro, e barasvlershme atëherë me 3.5 milionë dollarë. Ajo dhe de la Torre, 58 vjeç, u martuan në vitin 2022 në një dasmë pikante në Ravello, Itali, në Bregun e Amalfit.
Komisioni i Senatit për Shëndetësinë, në një votim dypartiak autorizoi një hetim dhe thirri de la Torre për të dëshmuar në një seancë dëgjimore të 12 shtatorit. Një juri e madhe federale në Boston po heton “Steward”-in, duke përfshirë nëse ai ka shkelur ligjet kundër ryshfetit në një marrëveshje për të drejtuar spitalet shtetërore në Maltë.
Në maj, një gjykatës maltez rekomandoi akuza penale kundër de la Torre, duke përfshirë një për korrupsion të zyrtarëve publikë. Hetimi maltez ka çuar në akuza kundër ish-kryeministrit maltez dhe dhjetëra individëve të tjerë.
Zëdhënësja e De la Torres e quajti hetimin e gjyqtarit “një hakmarrje”.
Paratë e “Steward” shkuan gjithashtu për të mbështetur një kauzë personale. “Steward” zbuloi se ai bëri 3 milionë dollarë kontribute bamirësie vitin e kaluar në shkollën “Greenhill” në Addison, Teksas, ku djemtë binjakë adoleshente të de la Torre janë në shkollë të mesme.
Në mars, “Greenhill” hapi një strukturë të re 52,000 metra katrorë për klasat e matematikës dhe shkencës të quajtur Rosa O. Valdes STEM + Innovation Center. Ajo mban emrin e nënës së de la Torre.
“Greenhill” punësoi CREF si menaxher projekti për ndërtimin. Zëdhënësi i CREF tha se “Greenhill” e pagoi atë rreth 260,000 dollarë në 2022.
/Përgatiti për Hashtag.al, Klodian Manjani