Pse po shtohen zjarret në pallatet e reja? Drejtori i shërbimit zjarrfikës flet për rastin te pallati te Komuna e Parisit: Ishte ngjarje aksidentale, ja pse ndodhi
Arben Cara, Drejtor i shërbimit zjarrfikës foli sot në emisionin “Open” në News 24 lidhur me zjarret dhe rastet e shtuara kohët e fundit në vendin tonë. Cara u ndal te zjarri që përfshiu katin e katërt të një pallati te Komuna e Parisit pak ditë më parë në Tiranë. Zjarri shkaktoi dëme materiale, për fat të mirë nuk pati pasoja në njerëz.
Cara tha se rasti te Komuna e Parisit ishte ngjarje aksidentale dhe se flakët u përhapën për shkak se një punonjës në një nga zyrat e marra me qira te pallati kishte harruar ndezur një pajisje për ngrohje. Ai theksoi se zjarret në objekte banimi përhapen edhe për shkak të materialit të lëndëve të ndërtimit dhe pajisjeve që ndodhen në objekt.
Arben Cara: Ne kemi të bëjmë me ngjarjen aksidentale në një nga zyrat e marra me qira te kompleksit kika. Një punonjës kishte harruar ndezur një pajisje ngrohje.Patjetër që ka të bëjë edhe pjesa e ndërtimit, materiali që përdoret ne ndërtimin, por kryesisht zjarret ndihmohen nga mobiliet që kemi në banesë.
Shumë i rëndësishëm për këto raste është reagimi në kohë dhe njoftimi në 128.
Në të tilla raste njerëzit panikosen dhe nuk marrin në telefon 128, ata marrin policinë, por kjo është humbje kohe deri sa policia të njoftojë ne. Lëndimet që njerëzit marrin në këto raste mund të jenë edhe fatale. Çdo pallat duhet të ketë një grup të trajnuar për rastet e zjarrit. Mbetet për tu parë nëse ky objekt ka qenë i pajisur me mjetet e duhura për raste zjarri./ballkanweb