Kolonët ilegalë i.zraelitë d.jegin tokat palestineze në Bregun Perëndimor të p.ushtuar
Kolonët ilegalë izraelitë të shtunën i vunë zjarrin tokave bujqësore palestineze në qytetin Yabrud, në lindje të Ramallahut në Bregun Perëndimor të pushtuar, sipas zyrtarëve palestinezë. Kolonët u infiltruan në zonën Bab al-Wad dhe ndezën zjarre në fusha me bar dhe ullishte, raportoi agjencia zyrtare palestineze e lajmeve Wafa.Sipërfaqe të mëdha toke të kultivuara u dëmtuan, ndërsa kolonët i penguan banorët të arrinin në vendngjarje për të shuar flakët, tha agjencia.
Veçmas, gjashtë familje palestineze u detyruan të largoheshin nga shtëpitë e tyre në Khirbet Samra, Bregun Perëndimor verior, mes sulmeve të vazhdueshme nga kolonët ilegalë izraelitë, tha për Anadolu Mahdi Draghmeh, kreu i këshillit të fshatit al-Maleh në Luginën Veriore të Jordanit.
"Gjashtë familje, me gjithsej mbi 25 anëtarë, u detyruan të çmontonin shtëpitë dhe tendat e tyre dhe të largoheshin nga Khirbet Samra, e vendosur rreth 15 kilometra në jug të qytetit Tubas," tha Draghmeh.
Ai shtoi se banorët e komunitetit janë përballur me sulme të përsëritura nga kolonët për vite me radhë, por situata u përkeqësua pas fillimit të luftës në Gaza më 7 tetor 2023, pasi "ata përballen me bastisje në shtëpitë e tyre dhe rrethimin e zonës, duke i penguar ata të hyjnë në kullotat ku rrisin bagëti".
Draghmeh tha se banorët e komunitetit, i cili ndodhet në Zonën C, u detyruan të zhvendoseshin në Zonën A të guvernatorit Tubas.
Sipas Marrëveshjes së Oslos II të vitit 1995, Bregu Perëndimor u nda në tre zona: Zona A nën kontrollin e plotë palestinez, Zona B nën kontrollin e sigurisë izraelite dhe administratën civile palestineze, dhe Zona C nën kontrollin e plotë civil, administrativ dhe të sigurisë izraelite, e cila përbën rreth 61% të zonës së Bregut Perëndimor.
Sulmi erdhi mes një rritjeje të dhunës së kolonëve në të gjithë Bregun Perëndimor, ku kolonët e paligjshëm kanë organizuar sulme ndaj palestinezëve, shtëpive, pronave dhe tokave bujqësore, dhe kanë krijuar poste vendbanimesh.
Shifrat palestineze tregojnë se të paktën 415 sulme të kolonëve u regjistruan muajin e kaluar në të gjithë territorin e pushtuar.
Që nga fillimi i sulmit të Izraelit në Gaza më 7 tetor 2023, të paktën 986 palestinezë janë vrarë dhe më shumë se 7,000 janë plagosur në Bregun Perëndimor nga forcat dhe kolonët izraelitë, sipas Ministrisë Palestineze të Shëndetësisë.
Gjykata Ndërkombëtare e Drejtësisë korrikun e kaluar e shpalli të paligjshëm pushtimin e territorit palestinez nga Izraeli dhe bëri thirrje për evakuimin e të gjitha vendbanimeve në Bregun Perëndimor dhe Jerusalemin Lindor./yenisafak