Qytetari që shet votën do të dënohet më shumë se politikani që e blen!
Në Republikën e Shqipërisë, Drafti i Kodit të ri Penal thekson se qytetari që shet votën rrezikon të kalojë më shumë kohë pas hekurave sesa politikani që ia blen atë me një thes miell, një vend pune të premtuar, apo një premtim për asfalt në mëhallë.
Neni 296 i draft Kodit të ri Penal, një vepër e frymëzuar artistikisht nga Arben Rakipi dhe i prezantuar nga Ministria e Drejtësisë, parashikon që nëse ti, si qytetar i thjeshtë, guxon të shkëmbesh votën për ndonjë “nder të vogël”, para apo thes miell, do të shijosh 7 vjet në burg, ku s’mund të të blejë më askush.
Ndërkohë, politikani që ofron paratë, favorin apo vendin e punës, dënimin e ka disi më të lehtë vetëm deri në 6 vite burg. Mesa duket, Kodi i ri ndjek logjikën e tregut, ai që shet është më i rrezikshëm se ai që blen. Sepse, ku do t’i çosh gjithë ata politikanë të uritur për vota, nëse s’ka më popull që shet? Është një farë mbrojtjeje e i/e kandidatit me çantë lekësh në dorë për popullin që mashtrohet kollaj.
Për të qeshur e për të qarë, drafti penal godet edhe të paaftët për të manipuluar me sukses. Ata që votojnë më shumë se një herë, tani mund të marrin 4 vite burg, ndërsa ata që thjesht fotografojnë votën, mund ta kalojnë me një gjobë. Pra, po s’qe i aftë të mashtroni mirë, të paktën mos bëni selfie në kuti, nuk është më në modë./joq