Raporti: YouTube fshin qindra video nga grupet palestineze për të drejtat e njeriut
YouTube ka fshirë në heshtje më shumë se 700 video dhe ka mbyllur llogaritë e tri organizatave kryesore palestineze për të drejtat e njeriut, sipas një raporti të publikuar të martën nga The Intercept.
Llogaritë e fshira i përkisnin Al-Haq, Al Mezan Center for Human Rights dhe Palestinian Centre for Human Rights, të cilat kishin publikuar pamje të shumta që dokumentonin shkelje të ligjit ndërkombëtar nga Izraeli në Gazë dhe Bregun Perëndimor të pushtuar.
Sipas The Intercept, përmbajtjet e fshira përfshinin hetimet mbi sulmet izraelite, dëshmitë e të mbijetuarve dhe dokumentime të vrasjes së gazetares palestinezo-amerikane Shireen Abu Akleh.
Fshirjet ndodhën në fillim të tetorit, menjëherë pasi qeveria amerikane vendosi sanksione ndaj këtyre grupeve për bashkëpunimin e tyre me Gjykatën Ndërkombëtare Penale (GjNP).
YouTube konfirmoi se mbylljet e llogarive u kryen pas një rishikimi të nxitur nga sanksionet amerikane, duke deklaruar se platforma ka detyrim të përmbahet ligjeve për tregtinë dhe sanksionet./trt