Komuniteti shqiptar mbeshtet ne zgjedhjet e SHBA-ve kongresmenin Jamal (Xhemal) Bowman
Nga Armir Taraj / Të premten, më 9 shkurt, një grup prej rreth 20 profesionistësh dhe pronarësh biznesi shqiptaro-amerikanë organizuan një darkë për mbledhje fondesh me kongresmenin Jamaal Bowman në restorantin e njohur shqiptar në Bronx Çka Ka Qëllu. Kongresmeni Bowman përfaqëson distriktin e kongresit NY-16 në Uashington DC, i cili mbulon zona të Bronx-it të veriut dhe Westchester-it të jugut që kanë një zonë të konsiderueshme shqiptaro-amerikane. Ai po përballet me një sfidë të vështirë brenda partisë Demokratike këtë vit zgjedhor nga Drejtori Ekzekutiv i komunës Westchester George Latimer.
Kongresmeni Bowman donte të dëgjonte nga komuniteti në lidhje me shqetësimet e tyre dhe ngjarjet aktuale. Grupi foli për Kosovën dhe sfidat me të cilat po përballet në forcimin e sovranitetit të saj përballë intransigjencës dhe sabotazhit të vazhdueshëm serb. Disa në grup ishin kritikë për rolin që Ambasadori i SHBA-së ka luajtur kohët e fundit në Kosovë në presionin ndaj qeverisë Kurti që të tërhiqet nga masat e afirmimit të sovranitetit, siç është nxjerrja jashtë ligjit e përdorimit të çdo valute të huaj.
Kongresmeni Bowman ishte i etur të mësonte për historinë e gjatë të shtypjes së popullit shqiptar në Ballkan. Një nga të pranishmit ndau një rrëfim emocionues se si 17 anëtarë të familjes së tij të gjerë ishin vrarë në Luftën e Kosovës 1998-1999 dhe se si askush nga pala serbe nuk është mbajtur ende përgjegjës, përfshirë për rrëmbimin dhe vrasjen e tre shtetasve amerikanëve, vëllezërit Bytyçi. Kongresmeni Bowman u zotua për të pranishmit të japë zërin dhe mbështetjen e tij në Kongres për këto shqetësime, si dhe të ndërmarrë hapa aktivë për t'u bashkuar me Grupin e Kongresit për Çështjet Shqiptare, të udhëhequr aktualisht nga Rep. Ritchie Torres nga Bronx.
Kur u pyet se pse e mbështeti kongresmenin Bowman si shqiptaro-amerikan, një i pranishëm i ri, Dardan Beselica, u përgjigj: “Besoj se e ardhmja e Partisë Demokratike në Amerikë është progresive dhe komuniteti shqiptaro-amerikan duhet ta mbështesë me gjithë zemër. Progresistët kanë dëshmuar se janë në mbrojtje të të gjitha grupeve të margjinalizuara në mënyrë që të përballen me dhunuesit e tyre. Gjatë gjithë historisë sonë shqiptarët janë torturuar nga agresorët në Ballkan, ku Serbia është dhunuesi më i madh. Kongresmeni Bowman e kupton këtë dhe askush nuk është më i mirë për t'u bërë ballë bullizuesve sesa një ish-drejtor shkolle publike.”
Mezi presim që Kongresmeni të bëjë një njoftim në ditën e Pavarësisë së Kosovës si dhe njoftime të tjera të rëndësishme në lidhje me çështjet shqiptare shumë shpejt!
Përgatiti A. Taraj, Nju Jork