Trump thotë se do “të mbarojë punën” në Iran, për “dy-tri javë” të tjera luftë
Presidenti amerikan, Donald Trump, tha se pret që lufta me Iranin të përmbyllet brenda “dy apo tre javësh”.
Ai i bëri këto deklarata teksa nënshkroi një urdhër ekzekutiv në Shtëpinë e Bardhë më 31 mars. Trump tha po ashtu se “Franca dhe shtete të tjera”, sikurse Kina, duhet “të mbrohen vetë” sa i përket kalimit të Ngushticës së Hormuzit, që praktikisht është mbyllur nga Irani në shenjë hakmarrje për sulmet amerikane dhe izraelite që kanë nisur ndaj Iranit më 28 shkurt.
“Ne i kemi goditur fort. Ne kemi eliminuar shumë prej të çmendurve të radikalizuar përgjatë ngushticës”, pretendoi ai, duke shtuar se “brenda dy javësh, ndoshta tre, ne do të largohemi” nga rajoni.
Edhe sekretari amerikan i Shtetit, Marco Rubio, së voni ka përsëritur disa herë se është çështje javësh, e jo muajsh, përmbyllja e konfliktit me Iranin.
Presidenti Trump tha se “ne po negociojmë aktualisht me ta”, duke shtuar se “ne kemi parë ndryshim të regjimit, edhe pse regjimi nuk ishte një prej qëllimeve të mia”.
Teherani dhe Uashingtoni kanë dërguar mesazhe të përziera lidhur me përpjekjet për t’i dhënë fund konfliktit.
Ministri i Jashtëm iranian, Abbas Araqchi, në një intervistë për Al Jazeera të transmetuar më 1 prill tha se “nuk po zhvillohet” asnjë negociatë me SHBA-në dhe se Teherani “nuk i është përgjigjur” planit të raportuar të Uashingtonit prej 15 pikash për përfundimin e luftës.
“Ne kemi pranuar mesazhe nga amerikanët, disa të drejtpërdrejta, disa përmes miqve tanë në rajon, dhe ne do t’iu përgjigjemi këtyre mesazhe kurdo që të jetë e nevojshme”, tha ai.
“Nuk ka bazë për negociata [me SHBA-në]”, tha ai, duke shtuar se sigurisht disa mesazhe janë këmbyer drejtpërdrejt me të dërguarin e posaçëm amerikan, Steve Witkoff.
Plani amerikan, sipas raportimeve, përsërit kërkesat e Uashingtonit që Irani të çmontojë objektet e tij bërthamore, të kufizojë kapacitetet e tij raketore dhe të ndalë mbështetjen për forcat aleate në rajon.
Jozyrtarisht, Teherani i është përgjigjur ashpër planit me 15 pika të Uashingtonit, duke thënë se kushtet e SHBA-së janë të tepruara dhe se do t’i japë fund luftës kur të vendosë vetë dhe nëse plotësohen kushtet e tij, duke këmbëngulur se ka të drejtë të zhvillojë programin e tij të raketave balistike.
