Gjykatësi amerikan bllokon deportimet e emigrantëve aziatikë në Libi
Një gjykatës federal bllokoi përkohësisht të mërkurën çdo deportim të të huajve nga Azia në Libi , ndërsa administrata e Presidentit Donald Trump kërkon vende të tjera për të dërguar migrantë nga vende të treta, siç është El Salvadori.
Gjykatësi Brian Murphy vendosi që këto deportime do t’i privonin emigrantët e kërcënuar me deportim në vende të treta, në vend të vendeve të tyre të origjinës, nga çdo mundësi “e konsiderueshme” për të kundërshtuar masën duke iu drejtuar drejtësisë amerikane.
Vendimi i tij pasoi një apel urgjent nga avokatët e emigrantëve nga Laosi, Filipinet dhe Vietnami, pasi ishin në rrezik, siç argumentuan ata, të deportoheshin “menjëherë” në Libi, një vend “famëkeq” për “shkeljet e të drejtave të njeriut”, veçanërisht të emigrantëve.
Kreu i diplomacisë amerikane, Marco Rubio, deklaroi në fund të prillit se Uashingtoni po kërkonte “në mënyrë aktive” vende të tjera, të tilla si El Salvadori, për të deportuar shtetas të vendeve të treta.
Dy burime të njohura me çështjen, të cilët folën në kushte anonimiteti, thanë në atë kohë se Ruanda ishte ndër vendet me të cilat po zhvilloheshin bisedime për të pranuar migrantët nën deportim.
Në të njëjtën kohë, mediat amerikane, përfshirë CNN, raportuan gjithashtu për Libinë.
I pyetur për këtë, Donald Trump siguroi dje se nuk ishte në dijeni.
Presidenti amerikan premtoi gjatë fushatës së tij se do të deportonte miliona emigrantë pa dokumente, por vendimet e tij për ta bërë këtë bllokohen nga vendimet e gjyqtarëve – diçka që shpesh shkakton shpërthime zemërimi nga ana e republikanit.
Qeveria e Unitetit Kombëtar (GNU) e Libisë, nga ana e saj, mohoi të mërkurën se kishte lidhur ndonjë marrëveshje me Uashingtonin për të pranuar njerëz të deportuar nga SHBA-të.
E zhytur në kaos pas përmbysjes së regjimit të Muamar Gadafit në vitin 2011, Libia ka dy qeveri që konkurrojnë për pushtet.
Ministria e jashtme e qeverisë në Libinë lindore gjithashtu mohoi “ekzistencën e ndonjë marrëveshjeje ose mirëkuptimi për të pritur migrantë të çdo kombësie”.
Libia është një vend tranziti për qindra mijëra emigrantë, kryesisht nga Afrika Sub-Sahariane, të cilët përpiqen të kalojnë Mesdheun në mënyrë jashtëzakonisht të rrezikshme me shpresën për të arritur në Evropë./ballkanweb