Përse I*zraeli vazhdon të sulmojë objektet antike të kultit dhe simbolet fetare në Gaza?
Fundjavën e kaluar, videot e reja në mediat sociale treguan ushtarë izraelitë që përdhosnin xhaminë Beni Saleh në Gaza dhe grisnin një kopje të Kuranit të shenjtë, duke riforcuar edhe një herë sulmin e vazhdueshëm të shtetit zionist ndaj vendeve dhe simboleve fetare islame në luftën e tij të pamëshirshme kundër palestinezëve. Sulmi izraelit ndaj librit të shenjtë të Islamit dhe xhamive ka ngjallur një reagim të ashpër nga Hamasi, grupi palestinez i rezistencës.“Ne dënojmë fuqishëm veprimet e ushtarëve sionistë që djegin kopje të Kuranit gjatë bastisjes dhe përdhosjes së xhamisë Beni Saleh në Gazën veriore”, tha grupi në një deklaratë në Telegram.
“Djegia e Kuranit, përdhosja, shënjestrimi dhe shkatërrimi i xhamive konfirmon natyrën ekstremiste të këtij entiteti dhe ushtarëve të tij, të mbushur me urrejtje dhe kriminalitet, si dhe sjelljen e tyre fashiste ndaj gjithçkaje që lidhet me identitetin dhe shenjtërinë e kombit. ”, thuhet në deklaratën e Hamasit.
Në deklaratat e mëparshme, grupi i rezistencës palestineze i kishte kërkuar UNESCO-s të shpëtonte trashëgiminë fetare dhe ndërtesat historike në Gaza, ku bombardimet pa dallim, të Izraelit kanë vrarë më shumë se 40,000 civilë, kryesisht fëmijë dhe gra.
Ekspertët i shohin sulmet izraelite në vendet historike si një "gjenocid kulturor", i cili është pjesë e "fushatës së tij gjenocidale" mbi popullsinë civile të Gazës.
Trashëgimia e bombardimeve
Pamjet e shfaqura së fundmi me dron tregojnë një sulm të qëllimshëm ajror izraelit, dhjetorin e shkuar, në Xhaminë e Madhe të Gazës, një nga vendet më të vjetra të adhurimit mysliman i cili vazhdoi të qëndronte i palëkundur për shumë shekuj.
Historia e xhamisë shkon pas në shekullin e VII pas Krishtit, kur muslimanët çliruan Jerusalemin dhe Palestinën, duke përfshirë Gazën, nga Perandoria Romake, duke i bërë ata pjesë të Kalifatit Islamik. Ibn Battuta, një udhëtar dhe shkrimtar i famshëm mysliman i shekullit të 14-të, e quajti atë "Xhamia e Bukur".
Shumë banorë të Gazës besojnë se "Izraeli po shkatërron çdo gjë të bukur" në qytetin e tyre, duke e penguar popullsinë e tij "të gjejë njëfarë ngushëllimi", tha për Haaretz, një media izraelite, Dotan Halevy, historian dhe doktor në Institutin Van Leer, në një intervistë të dhjetorit.
Sipas autoriteteve të Gazës, deri më sot, Izraeli ka shkatërruar më shumë se 600 xhami dhe tre kisha. Izraelitët dëmtuan pjesërisht më shumë se 200 xhami, përveç shkatërrimit të dhjetëra vendeve të trashëgimisë antike.
Targetimi i objekteve fetare konsiderohet një krim lufte sipas ligjit ndërkombëtar humanitar, por Izraeli ka përfituar prej kohësh statusin mosndëshkueshmërisë nga perëndimi për krimet e tij të luftës.
Këtu janë dy vendet më historike të Gazës të sulmuara nga Izraeli:
Xhamia e Madhe e Gazës
Xhamia është vendi më i vjetër dhe më i madh i adhurimit musliman në Gaza me një histori shumë interesante, e cila daton që nga filistinët, sundimtarët e lashtë të qytetit dhe pjesës më të madhe të Palestinës, dhe armiqtë e shpallur të çifutëve të atëhershëm.
Rreth trembëdhjetë shekuj më parë, në vendin e xhamisë së sotme, qëndronte një kishë e krishterë e epokës bizantine, e cila, nga ana tjetër, u ndërtua mbi një tempull pagan filistin.
Kisha u shndërrua në xhami pas çlirimit musliman të Gazës dhe u quajt Xhamia e Madhe e Gazës. Myslimanët gjithashtu e quajtën atë Xhamia e Madhe e Umerit , i ciili ishte një shok i ngushtë i Profetit Muhamed dhe kalifi i dytë në shekullin e VII.
Hapësira fetare ka qenë prej kohësh e rëndësishëme për udhëheqjen moderne izraelite për shkak të lidhjes së tij me filistinët e lashtë. Megjithëse filistinët nuk kanë lidhje me palestinezët, sipas ekspertëve, emri i tyre ka një lidhje etimologjike me fjalën Palestinë.
Sipas Biblës, Samsoni izraelit, një nga patriarkët kryesorë të hebrenjve dhe një armik kryesor i filistinëve, vdiq në mënyrë dramatike duke u përplasur me filistinët në tempullin e tyre pagan në Gaza, ku xhamia qëndroi deri në shkatërrimin e saj nga izraelitët e tanishëm gjatë luftës në vazhdim. Tradita lokale beson se Samsoni u varros nën tempullin filistin.
Bibla thotë se heroi izraelit luftoi me filistinët, por armiqtë e tij e kapën me një mashtrim dhe e mbajtën rob në tempullin e tyre në Gaza. Duke parë dështimin e tij si rezultat i mangësive të tij personale, Samsoni vendosi të bënte një përpjekje të fundit duke bërë që kolonat e tempullit filistin të shembeshin për të mposhtur mbajtësit e lashtë të qytetit. "Më lejoni të vdes me filistinët," tha ai para se të vdiste në Gaza.
Omer Bartov, një studiues kryesor izraelit, kohët e fundit argumentoi në një artikull gjithëpërfshirës se historia e Samsonit izraelit mund të jetë shumë domethënëse lidhur me atë që udhëheqja moderne izraelite po bën tani në Gaza. Në një artikull të Haaretz të botuar javën e kaluar, një ish-gjeneral i lartë izraelit i është referuar gjithashtu historisë duke thënë se Netanyahu zgjodhi të "vdiste me filistinët" në fushatën e tij aktuale në Gaza, duke mos përcaktuar një objektiv të qartë politik.
Bartov tha se historia e Samsonit ka rezonuar me udhëheqjen sioniste që nga vitet 1950 dhe potencialisht më herët. Në vitin 1956, Moshe Dayan, një gjeneral i lartë izraelit, i cili luajti një rol kritik në luftën e vitit 1967, mbajti një fjalim me një referencë rreth Samsonit pas një sulmi palestinez të vitit 1956 në kibutin Nahal Oz në Gaza, shkroi Bartov.
Sipas Bartov, Dayan përdori historinë e Samsonit si një mësim për popullatën hebreje të vendit për kërcënimet e mundshme që mund të paraqiste enklava palestineze. I njëjti Nahal Oz ishte gjithashtu në shënjestër të Hamasit në sulmin e tij të 7 tetorit.
Kisha e Shën Porfirit
Ky vend adhurimi i krishterë është kisha më e vjetër në Gaza, e cila gjithashtu është shënjestruar nga sulmet izraelite të paktën dy herë që nga 7 tetori, duke dëmtuar disa nga pjesët e saj. Kisha ka strehuar palestinezët e krishterë dhe myslimanë gjatë luftës së Izraelit në Gaza.
Një sulm izraelit i tetorit goditi dy sallat e kishës ortodokse greke, duke çuar në shembjen e të paktën një ndërtese dhe duke vrarë më shumë se dhjetë civilë. Sulmi u dënua nga e gjithë bota. Në një deklaratë, Patriarkana Ortodokse Greke tha se “vënia në shënjestër e kishave dhe institucioneve të lidhura me të” është “një krim lufte që nuk mund të injorohet”.
"Ne e dënojmë këtë sulm të pandërgjegjshëm ndaj një kompleksi të shenjtë dhe i bëjmë thirrje komunitetit botëror të garantojë mbrojtje në Gaza për vendet e shenjta të strehimit, duke përfshirë spitalet, shkollat dhe vendet e adhurimit," tha Këshilli Botëror i Kishave.
Kisha e Gazës, e quajtur sipas peshkopit të shekullit të 5-të Shën Porfiri, u ndërtua fillimisht rreth vitit 425 pas Krishtit. Por ndërtesa e saj aktuale u ndërtua nga kryqtarët në mesin e shekullit të 12-të.
Kisha gjithashtu përfshin varrin e Shën Porfirit në cepin verilindor të saj./trtworld