Izraeli bombardon shtëpitë në Jenin, vret 7 palestinezë dhe plagos disa të tjerë

Wednesday, 13 December 2023 14:36

• Written by AA

Ushtria izraelite bombardoi tre shtëpi në qytetin Jenin të Bregut Perëndimor nën pushtim dhe ka vrarë shtatë palestinezë, si dhe ka plagosur disa të tjerë.

Forcat izraelite vazhdojnë sulmet e tyre kundër qytetit Jenin dhe kampit të refugjatëve Jenin në Bregun Perëndimor, duke i zgjeruar ato në mënyrë që të përfshijë pjesën më të madhe të qytetit.

Po ashtu forcat izraelite kanë rrethuar plotësisht rajonin duke e bllokuar me automjete ushtarake dhe buldozerë, ndërsa kanë vendosur snajperë në çatitë e ndërtesave të larta në qytet.

Dëshmitarët theksuan se forcat izraelite bombarduan tre shtëpi të palestinezëve në qytet. Ata theksuan se në sulm kanë humbur jetën shtatë palestinezë dhe se ka edhe të plagosur.

Në rajon vazhdojnë konfliktet dhe dëgjohen shpërthime, theksojnë dëshmitarët të cilët janë shprehur se buldozerët izraelitë kanë shkatërruar infrastrukturën e kampit të refugjatëve Jenin dhe kanë dëmtuar pronat e qytetarëve.

Edhe në një deklaratë nga Shoqata e të Burgosurve Palestinezë thuhet se dje në qytetin në fjalë nën pushtim dhe në kampin e refugjatëve u arrestuan të paktën 100 persona, ndërsa që nga 7 tetori kur filluan sulmet ndaj Gazës janë arrestuar 400 persona.

Ministria palestineze e Shëndetësisë së fundmi ka konfirmuar se 282 palestinezë janë vrarë që nga 7 tetori e deri më tani nga forcat izraelite dhe kolonët hebrenj në Bregun Perëndimor dhe Kudsin Lindor nën pushtim.

Që kur forcat izraelite filluan sulmet e tyre në Gaza, është shënuar rritje e arrestimeve dhe bastisjeve kundër palestinezëve në rajonin nën pushtim.

Burimi: AA

Në sulmet izraelite në Gaza vriten 22 palestinezë, përfshirë fëmijë

Wednesday, 13 December 2023 14:32

• Written by AA

Në sulmet e kryera nga forcat izraelite në Rripin e bllokuar të Gazës, janë vrarë 22 palestinezë, përfshirë fëmijë ndërsa janë plagosur shumë persona.

Siç raporton agjencia zyrtare palestineze e lajmeve WAFA, Izraeli kreu sulme në pjesë të ndryshme të Khan Younis, duke përfshirë jugun, perëndimin dhe kampin e refugjatëve.

Në lajm thuhet se 20 persona në Khan Yunus humbën jetën dhe shumë të tjerë u plagosën nga sulmet. Në mesin e të vrarëve ka edhe fëmijë.

Dy fëmijë kanë humbur jetën si pasojë e sulmeve izraelite në rajonin Deir el-Beleh të Rripit të Gazës.

Burimi: AA

Vriten 10 ushtarë të tjerë izraelitë në luftimet në veri të Gazës

Wednesday, 13 December 2023 12:58

• Written by AA

Ushtria izraelite njoftoi të mërkurën se 10 trupa të saj, përfshirë komandantë, u vranë në betejat në veri të Rripit të Gazës në 24 orët e fundit,

Në deklaratën e parë, ushtria izraelite tha se 8 ushtarë të saj u vranë në betejat në lindje të Gazës ndërsa 3 të tjerë u plagosën rëndë.

Transmetuesi publik KAN tha se në mesin e të vrarëve është nënkoloneli Tomer Grinberg, 35-vjeç, komandant i Batalionit të 13-të të Brigadës Golani, majori Roei Meldasi, 23-vjeç, komandanti i kompanisë në Batalionin e 13-të të Brigadës Golani dhe majori Moshe Avram Bar, 23-vjeç, komandant kompanie në Batalionin 51 të Brigadës Golani.

Gazeta izraelite "Times of Israel", duke cituar një burim ushtarak, tha se 7 nga 8 ushtarët u vranë në një seri shpërthimesh ndërsa kontrollonin ndërtesa në lagjen Shejaiya të qytetit të Gazës.

Në një deklaratë të veçantë, ushtria izraelite tha se 2 ushtarë të tjerë, përfshirë një komandant ushtarak u vranë në betejat në veri të Gazës. Rastet e fundit e çojnë në të paktën 115 numrin e ushtarëve izraelitë të vrarë në ofensivën tokësore që nga fundi i tetorit.

Izraeli ka bombarduar Rripin e Gazës nga ajri dhe toka, ka vendosur rrethim të plotë dhe ka ndërmarrë ofensivë tokësore si hakmarrje për sulmin ndërkufitar të Hamasit më 7 tetor. Të paktën 18.412 palestinezë janë vrarë dhe 50.100 janë plagosur në sulmet e pamëshirshme izraelite, sipas autoriteteve shëndetësore të Gazës.

Numri zyrtar i izraelitëve të vdekurve është 1.200 ndërsa rreth 139 pengje izraelite mbeten në robëri, sipas shifrave zyrtare.

Sulmet e pamëshirshme izraelite kanë detyruar gjithashtu rreth 1.9 milionë palestinezë të largohen nga shtëpitë e tyre. Banorët e Gazës përballen me mungesa të mëdha të ushqimit, ujit dhe mallrave të tjera bazë, pasi ndihma lejohet vetëm në sasi të kufizuar.

Asambleja e Përgjithshme e OKB-së votoi të martën me shumicë dërmuese për një armëpushim humanitar në Gaza, me 153 vota pro, 10 kundër dhe 23 abstenime.

Burimi: AA

Ra nga skela ku po punonte, humb jetën punëtori shqiptar në Itali

Tuesday, 12 December 2023 16:04

• Written by Lapsi.al

Një ngjarje e rëndë ka ndodhur në Itali pasditen e sotme, ku një 61-vjeçar shqiptar ka humbur jetën pasi ka rënë nga skela ku po punonte.

Punëtori shqiptar, teksa po punonte në katin e katërt të një skele, u rrëzua nga një lartësi rreth 8-10 metra, dhe ndërroi jetë në vendngjarje. Kryebashkiaku Giancarlo Canepa, i cili mbërriti menjëherë në vendin e aksidentit, shprehu pikëllim për ngjarjen.

“Një tragjedi, vajtojmë një tjetër vdekje të papritur dhe një tjetër familje të rrënuar. Në këto raste nuk ka fjalë, tani hetimet do të bëjnë punën e tyre për të konstatuar saktësisht se çfarë ka ndodhur dhe për të hedhur dritë mbi të gjitha aspektet e ngjarjes”, tha ai, shkruajnë mediat italiane.

Dëshmitarja e vetme , një grua që punon në një supermarket pranë godinës, iu drejtua klinikës së Infermierisë Mjekësore aty pranë për të kërkuar ndihmë të menjëhershme, por fatkeqësisht nuk mundej të bëhej gjë.

Burimi: AA