Biden thotë se do të largohej menjëherë nga gara nëse diagnostikohej si ‘i sëmurë’, por presioni rritet
Joe Biden ka thënë së fundmi në një intervistë se do të largohej nga gara presidenciale 2024 nëse diagnostikohej me “gjendje mjekësore” nga doktorët. Zhvillimi vjen mes rritjes së presionit edhe nga vetë demokratët për largimin e tij teksa kongresmeni Adam Schiff iu bashkua së fundmi 20 demokratëve të tjerë të Kongresit për të kërkuar tërheqjen e presidentit duke thënë se është “koha që ai të kalojë pishtarin”. Në një raport të fundit për një konferencë që presidenti mbante me demokratët e moderuar, biseda përshkruhej nga një prej tyre si “më keq se një debat”, duke shtuar se Biden shpesh humbte fillin e mendimit gjatë lidhjes.
SHBA, ish analistja e CIA-s akuzohet se punonte për Korenë e Jugut
Një specialiste e politikës së jashtme, e cila dikur punonte për CIA-n dhe Këshillin e Sigurisë Kombëtare të Shtëpisë së Bardhë, përballet me akuza se ka punuar si agjente e paregjistruar e qeverisë së Koresë së Jugut në këmbim të dhuratave luksoze dhe sendeve të tjera.
Sipas një aktakuze të bërë publike të martën në gjykatën federale të Manhatanit në Nju Jork, Sue Mi Terry përkrahu qëndrimet politike të Koresë së Jugut, u dha punonjësve të zbulimit jugkorean informacione jopublike të qeverisë amerikane dhe mundësoi qasjen e zyrtarëve të Koresë së Jugut tek homologët e tyre amerikanë.
Erdoğan telefonatë me Trumpin: "Tentativa për atentat, sulm ndaj demokracisë"
Presidenti turk Recep Tayyip Erdoğan e përshkroi tentativën e javës së kaluar për atentat ndaj ish-presidentit amerikan Donald Trumpit si sulm ndaj demokracisë, transmeton Anadolu.
Sipas një njoftimi nga Drejtoria e Komunikimeve e Presidencës turke, Erdoğan dhe Trump zhvilluan një bisedë telefonike, duke folur në lidhje me atentatin gjatë mitingut në shtetin amerikan të Pensilvanisë të shtunën dhe pasojat e tij.
Irlanda thotë se "Izraeli nuk mund t'i vërë veto krijimit të shtetit palestinez"
Irlanda tha sot se "Izraeli nuk mund t’i vërë veto krijimit të një Shteti Palestinez", transmeton Anadolu.Komentet e ministrit të Jashtëm irlandez Micheal Martin erdhën pas raportimeve se parlamenti izraelit, Knesset, miratoi një rezolutë që thotë se krijimi i një shteti palestinez "në zemër të Tokës së Izraelit do të përbënte rrezik ekzistencial për shtetin e Izraelit dhe qytetarët e tij, do të përjetësonte konfliktin izraelito-palestinez dhe do të destabilizonte rajonin"."I tmerruar nga rezoluta e Knessetit që kundërshton Shtetin Palestinez edhe nëse është pjesë e marrëveshjes së negociuar me Izraelin", shkroi Martin në X.
Parlamenti Evropian refuzon kërkesën për të diskutuar për situatën në Gaza por jo atë për të mbështetur Ukrainën
Në Asamblenë e Përgjithshme të Parlamentit Evropian (PE) disa deputetë kërkuan që në fillim të legjislaturës së re përveç Ukrainës të trajtohet edhe situata në Gaza, por kjo kërkesë u refuzua me shumicë votash, raporton Anadolu.
Asambleja e Përgjithshme e PE-së, e cila u mblodh për herë të parë pas zgjedhjeve të 6-9 qershorit, mbajti një seancë me temën "Mbështetje për Ukrainën" në ditën e dytë.Roberta Metsola, e cila u rizgjodh si presidente e PE-së, ua dha fjalën përfaqësuesve të grupeve politike të cilët kërkuan të shtonin një pikë në rendin e ditës përpara se të kalonin në çështjen e Ukrainës.