Laçi: Paqja SHBA–Iran është iluzion! – Trump i ‘dhuroi’ Lindjen e Mesme Teheranit, rrezik për sulme ndaj vendeve arabe!

Friday, 10 April 2026 13:14

• Written by Mexhis

Marlind Laçi, ekspert i Marrëdhënieve Ndërkombëtare, deklaroi në emisionin “Të Paekspozuarit” në MCN TV se nuk beson që paqja mes SHBA dhe Iranit do të zgjasë përtej afatit 12 ditor. Ai u shpreh se pas konfliktit SHBA i ka dhuruar Iranit hegjemoninë në rajon dhe ky i fundit mund të sulmojë vende të vogla afër tij.

“Akordi i Islamabadit ka një javë që vijon. Nëse dokumenti që kanë paraqitur mediat, do të jetë firmosur, me ato 10 pikat që Irani do të vijojë pasurimin e uraniumit për qëllime civile, që do të kontrollojë Ngushticën e Hormuzit, nuk do të lejojë bazë të re amerikane në Lindjen e mesme dhe largimin e atyre që janë do të thotë se Irani është pranë krijimit të një hegjemonie në Lindjen e Mesme.

Më të rrezikuarat, pas Izraelit, janë vendet arabe, Kuvajti dhe Emiratet e Bashkuara Arabe të cilat deri-diku kanë qenë pjesëmarrëse në luftë dhe Irani ka mundësi t’i marrë ato.

Çfarë ndodhi me këtë gabim politik të presidentit Trump. Me ndërhyrjen në vitin 2003 në Irak me rrëzimin e Sadamit iu dha pushtetit milicive Shiite, kur u nisën që të rrëzonin një regjim sunit.

Në këtë kontekst amerikanët duke dashur që të rrëzonin regjimin Iranian, i dhuruan hegjemoninë e gadishullit arabik.

Presidenti Trump vendosi si objektiv rrëzimin e regjimit, shkatërrimin e programit bërthamor dhe të raketave balistike. Asnjë nuk u arrit, por I shtoi Hormuzin që mund të kthehet në një zonë ekskluzive iraniane dhe Garda Revolucionare mund të vendosë “traun” për cdo anije që kalon për të paguar haraçin për të dalë dhe për të hyrë nga Gjiri Persik.

Unë e shoh edhe më të koklavitur çështjen e Izraelit, edhe pse duket kaotik edhe me sulmet ndaj Libanit, ku kanë mbetur mbi 200 civilë të vdekur dhe konsiderohet një nga sulmet më të përbindshme pas vitit 1982 të luftës së parë mes Hezbollahut dhe Izraelit.

Pala iraniane ka bërë kërkesë që edhe Libani të bëhet pjesë e marrëveshjes. Vjet në qershor na u tha se Hezbollahu ishte shkatërruar ashtu si edhe program bërthamor i Iranit dhe paska qenë propagandë që të gjendet një casus beli për ta goditur përsëri Iranin.

Paqja 12 ditore nuk do të zgjasë pas përfundimit të afatit, kjo për shkak të Netanjahut, që ka një project mesianik që kërkon të shtrihet nga bregu i lumit Nil deri në brigjet perëndimore të lumit Eufrat"- tha Laçi.

Libani do të marrë pjesë në bisedimet në Uashington për armëpushimin

Friday, 10 April 2026 13:14

• Written by Mexhis

Libani do të marrë pjesë në bisedimet për armëpushim që do të mbahen në Uashington. Sipas ‘skynews’, zyrtarët libanezë do të udhëtojnë për në Uashington në ditët në vijim. Një zyrtar i lartë libanez ka deklaruar ‘se Libani ka thënë se një armëpushim është parakusht për arritjen e një marrëveshjeje më të gjerë me Izraelin’

Megjithatë, data e saktë e takimit ende nuk është konfirmuar. Ky njoftim vjen pasi kryeministri izraelit, Benjamin Netanyahu tha se vendi i tij do të fillonte negociatat me Libanin “sa më shpejt të jetë e mundur”.

Më herët ai kishte këmbëngulur se armëpushimi SHBA-Iran i rënë dakord më parë këtë javë nuk vlen për veprimet e Izraelit në Liban.

Pezullohen negociatat/ Irani: Nuk ka bisedime me SHBA sa kohë Izraeli sulmon Libanin

Friday, 10 April 2026 13:14

• Written by Mexhis

Negociatat e planifikuara midis Iranit dhe SHBA-së në Pakistan janë të pezulluara përkohësisht, për shkak të sulmeve izraelite në Liban dhe mosrespektimit të armëpushimit nga Shtetet e Bashkuara. Tasnim dhe agjencitë e tjera iraniane që janë pranë Gardës Revolucionare, kanë mohuar raportet në disa media që pretendonin se delegacioni iranian kishte mbërritur tashmë në Islamabad për bisedime me amerikanët.

Al-Jazeera thekson se delegacioni iranian nuk është nisur nga Teherani për bisedimet e planifikuara këtë fundjavë, duke argumentuar se përderisa sulmet izraelite në Liban vazhdojnë, negociatat nuk mund të zhvillohen.

Putin shpall armëpushim 32-orësh në Ukrainë për Pashkët Ortodokse

Friday, 10 April 2026 13:14

• Written by Mexhis

Presidenti i Rusisë, Vladimir Putin, ka shpallur një armëpushim të përkohshëm në Ukrainë me rastin e festës së Pashkëve Ortodokse, sipas një njoftimi zyrtar të Kremlinit.

Vendimi i Putin për një armëpushim 32-orësh gjatë fundjavës erdhi pas një thirrje të mëparshme nga Presidenti ukrainas, Volodymyr Zelensky, për një pauzë për të festuar Pashkët.

Dekreti i Putinit, i lëshuar nga Kremlini, urdhëron forcat ruse të respektojnë një armëpushim që fillon të shtunën në orën 16:00 dhe zgjat deri në fund të së dielës.

Zelensky propozoi më parë gjatë javës që secila palë të ndalonte së shënjestruari infrastrukturën energjetike të njëra-tjetrës gjatë festave, duke thënë se e bëri ofertën përmes Shteteve të Bashkuara, të cilat kanë ndërmjetësuar bisedimet midis delegacioneve nga Moska dhe Kievi, ndërsa pushtimi i Rusisë shtrihet në vitin e pestë. Nuk pati asnjë reagim të menjëhershëm nga Kievi ndaj njoftimit të Putinit.

Përpjekjet e mëparshme për të siguruar armëpushim kanë pasur pak ose aspak ndikim. Putin shpalli në mënyrë të njëanshme një armëpushim 30-orësh Pashkët e kaluar, por secila palë akuzoi tjetrën për shkeljen e tij.

Deklarata e Kremlinit që njoftonte armëpushimin tha se “janë lëshuar urdhra për këtë periudhë për të ndërprerë armiqësitë në të gjitha drejtimet”, duke shtuar se “trupat duhet të jenë të përgatitura për t’iu kundërvënë çdo provokimi të mundshëm nga armiku, si dhe çdo veprimi agresiv”.

Kremlini theksoi se pret që edhe pala ukrainase të ndjekë të njëjtin qëndrim, duke shpallur një armëpushim të ngjashëm gjatë kësaj periudhe festive.

“Ne supozojmë se pala ukrainase do të ndjekë shembullin e Federatës Ruse”, thuhet në deklaratë.

Rusia në fakt ka hedhur poshtë një armëpushim 30-ditor pa kushte të propozuar vitin e kaluar nga SHBA-të dhe Ukraina si një hap drejt paqes, duke këmbëngulur në vend të kësaj për një zgjidhje gjithëpërfshirëse, por Moska ka njoftuar disa armëpushime të shkurtra dhe të njëanshme.

Bisedimet e udhëhequra nga SHBA-të nuk kanë shënuar përparim në çështjet kyçe dhe vëmendja e Uashingtonit është zhvendosur në konfliktin e Lindjes së Mesme, ndërsa ushtritë ruse dhe ukrainase mbeten të bllokuara në betejë në vijën e frontit prej rreth 1,250 kilometrash.