Shikimi tinzar i një vrasësi buzagaz
Nga Alban Gorishti/ Një ngjarje e rëndë ka ndodhur para disa ditësh në Fier, ku 23-vjeçari Azgan Mërnica vrau në mënyrë të pashpjegueshme me armë zjarri efektivin e forcave ‘Shqiponja’, Novruz Cenaliaj. Një vrasje që duhet thënë se tronditi mbarë opinionin publik jo vetëm për nga dinamikat por edhe për nga arsyet dhe banaliteti i çastit. Nga ajo që u pa nga kamerat e sigurisë pasi shkëmbyen pak fjalë 23-vjeçari doli me armë zjarri në dorë nga makina dhe sulmoi menjëherë policin duke e i shkaktuar atij vdekjen pa i dhënë mundësi të mbrohet. Vetëm disa sekonda e ndanë jetën nga vdekja, disa sekonda që nga momenti që nga kontakti viziv e deri tek ekzekutimi gjakftohtë. Po ta mendosh edhe materializimi i një veprim nga më të rëndomtët, si për shembull hedhja e një hapi, kërkon mendim disa herë më gjatë, ndërsa vrasja e një qenie të gjallë e të vlerësuar sikurse është njeriu, polici, i riu, u thjeshtua brenda kornizës së një akti kaq të pakuptimtë saqë as “akrepat e sekondave nuk mundën dot ta përfshinin në numërim”.
