Të paktën 30 palestinezë janë vrarë në sulmin e ushtrisë izraelite ndaj vendbanimeve civile në qytetin Beit Lahiya në veri të Rripit të Gazës.
Sipas agjencisë zyrtare palestineze të lajmeve WAFA, Izraeli vazhdoi sulmet në Rripin e Gazës në ditën e 83-të.
Të paktën 20 palestinezë u vranë në një sulm ajror izraelit që synoi persona të zhvendosur në jug të Rripit të Gazës sot, thanë autoritetet lokale shëndetësore.
Avionët luftarakë goditën një shtëpi të banuar nga njerëz të zhvendosur në lagjen Al-Amal në qytetin Khan Younis, tha në një deklaratë zëdhënësi i Ministrisë së Shëndetësisë Ashraf al-Qudra.
Ministri i Punëve të Jashtme i Jordanisë, Ayman Safadi, është takuar me homologun e tij të Egjiptit, Sameh Shoukry, për të shkëmbyer mendime mbi përpjekjet për të arritur një armëpushim në Rripin e Gazës.
Duke u takuar në kryeqytetin egjiptian Kajro, njoftoi Ministria e Punëve të Jashtme e Jordanisë, shefat e diplomacisë së dy vendeve shkëmbyen mendime mbi procesin e vazhdueshëm të koordinimit dhe konsultimit midis dy vendeve për të siguruar një armëpushim.
Zv/sekretari i përgjithshëm i Federatës Ndërkombëtare të Gazetarëve (IFJ), Tim Dawson, ka deklaruar se sulmet izraelite ndaj gazetarëve për “të ndaluar daljen e lajmeve nga Gaza” përbëjnë krim lufte.
Duke folur për Anadolu mbi numrin në rritje të vdekjeve të gazetarëve në Gaza për shkak të sulmeve izraelite, Dawson tha se është e qartë se situata në Gaza është e tmerrshme për të gjithë dhe se ushqimi, karburanti dhe strehimi janë në mungesë.
Ushtria izraelite ka vënë në shënjestër katet e sipërme të selisë së Gjysmëhënës së Kuqe Palestineze në qytetin Khan Younis në jug të Rripit të Gazës me zjarr artilerie dhe shumë njerëz janë plagosur nga sulmi.
Në një deklaratë me shkrim të Gjysmëhënës së Kuqe Palestineze, thuhet se ushtria izraelite ka kryer një sulm me zjarr artilerie në katet e sipërme të selisë së saj në qytetin Khan Younis.
