Roger Waters i grupit Pink Floyd: Kur bëra thirrje për paqe, publiku izraelit ra në heshtje

Wednesday, 06 December 2023 20:47

• Written by Mexhlis

Ish-tekstshkruesi dhe vokalisti i grupit të muzikës rok “Pink Floyd”, Roger Waters, tregoi se si pasi bëri thirrje për paqe me Palestinën gjatë një koncerti në Izrael, publiku i tij papritmas ra në heshtje.

Duke folur këtë javë për transmetuesin kombëtar turk TRT World, ai tregoi se si në vitin 2016, ai anuloi një koncert pasi mësoi se vendi në parkun Hayarkon të Izraelit ishte ndërtuar mbi varret palestineze dhe më pas “e zhvendosi koncertin në një komunitet bujqësor ku kultivohej qiqra”.

“Pra, ne bëmë një koncert atje, erdhën 60.000 njerëz, mendoj se në atë kohë ishte koncerti më i madh që kishte qenë ndonjëherë në Izrael. Dhe ishte një sukses i madh”, tha ai.

Gjatë koncertit, vazhdoi ai, kishte vendosur të shprehte opinionin e tij.

“Kur u ngrita në këmbë dhe thashë se ju jeni brezi i të rinjve izraelitë që duhet të bëni paqe me fqinjët tuaj”, kujton ai, publiku kaloi shpejt nga entuziazmi në heshtje.

Waters përshkroi gjithashtu përshtypjen e tij nga vizita në Bregun Perëndimor të pushtuar një vit pas koncertit.

“Përbuzja dhe neveria absolute me të cilën unë me një pasaportë britanike në një automjet të UNRWA-së (agjencisë së OKB-së) u trajtova nga të gjitha rojet e reja kufitare izraelite. Dhe mbaj mend që mendova në atë kohë, nëse ata silleshin kështu me mua, si do të ishin për palestinezët”, tha Waters.

Tani, tha ai, “natyrisht, ne e dimë saktësisht se si janë ata për palestinezët, sepse, teksa po flasim, ata janë duke kryer gjenocid në Gaza”.

Waters, duke i përshkruar sulmet e Izraelit si “përtej imagjinatës”, tha: “Njerëzit në Gaza janë bombarduar ditë e natë nga F-16 për javë të tëra. Por ju ... as nuk mund të filloni të imagjinoni se si mund të jetë”.

Burimi: AA

Deputeti i PE-së, Pineda: Izraeli shënjestron veçanërisht gazetarët në Gaza

Wednesday, 06 December 2023 19:28

• Written by AA

Deputeti i Parlamentit Evropian (PE), Manu Pineda tha se "Izraeli ashtu sikurse çdo kriminel nuk dëshiron që askush të jetë dëshmitar i krimeve të tij. Si një prej prioriteteve të tij dëshiron të vrasë gazetarët".

Pineda, deputeti spanjoll dhe kreu i delegacionit të PE-së për Marrëdhëniet me Palestinën, mbajti një konferencë për media në PE lidhur me sulmet e Izraelit kundër gazetarëve.

Gazetari i AA-së rikujtoi vrasjen e kameramanit të Agjencisë Anadolu (AA), Montaser Al-Sawaf, nga sulmi ajror izraelit javën e kaluar dhe shtroi pyetjen "A mundet Izraeli të mbulojë masakrën e tij në Gaza duke vrarë gazetarë?".

Eurodeputeti Pineda dha përgjigjen se "Izraeli ashtu si çdo kriminel nuk dëshiron që askush të jetë dëshmitar i krimeve të tij. Si një prej prioriteteve të tij dëshiron të vrasë gazetarët. Izraeli ka vrarë 65 gazetarë në Gaza. Kjo është një shifër shumë e madhe", tha ai.

Vret edhe familjet e gazetarëve

Duke vënë theksin se Izraeli vret edhe familjet e gazetarëve, Pineda theksoi se në këtë mënyrë synon që t'i detyrojë ata (gazetarët) të mos kryejnë punët e tyre.

"Izraeli përfiton nga heshtja e komunitetit ndërkombëtar", tha Pineda duke shtuar se "Duhet të bindim qeveritë tona se duhet ta detyrojnë Izraelin të respektojë ligjin ndërkombëtar".

Ai kritikoi faktin se liderët vazhdojnë t'i japin mbështetje të pakushtëzuar Izraelit ndërkohë që në rrugët e Evropës ka ende protesta dhe demonstrata në mbështetje të Palestinës.

Deputeti spanjoll në një fjalim që mbajti në seancën e Asamblesë së Përgjithshme të PE-së më 22 nëntor, drejtoi kritika të ashpra ndaj administratës së BE-së. "Edhe sa fëmijë palestinezë duhet të vriten nga bombat e Izraelit që PE dhe BE të kërkojnë armëpushim?", tha Pineda.

Burimi: AA

Komisioneri i Lartë i OKB-së thirrje komunitetit ndërkombëtar për armëpushim urgjent në Gaza

Wednesday, 06 December 2023 19:26

• Written by AA

Komisioneri i Lartë i OKB-së për të Drejtat e Njeriut, Volker Türk i bëri thirrje komunitetit ndërkombëtar të insistojë si një zë i vetëm për çështjen e armëpushimit urgjent në Rripin e Gazës.

Türk u takua me gazetarët në Zyrën e OKB-së në Gjenevë.

Ai foli për situatën në Gazën e bllokuar dhe në sulmet intensive të Izraelit si dhe shpjegoi vështirësitë me të cilat përballet popullata civile. "Komuniteti ndërkombëtar për të drejtat e njeriut dhe për arsye humanitare duhet të insistojë si një zë i vetëm për çështjen e armëpushimit urgjent", tha Türk.

Burimi: AA

Palestina: KS-OKB të ndërhyjë urgjentisht për të ndaluar sulmet e Izraelit

Wednesday, 06 December 2023 19:23

• Written by AA

Zëdhënësi i Presidencës palestineze, Nabil Abu Rudeineh i bëri thirrje Këshillit të Sigurimit të Kombeve të Bashkuara (KS-OKB) të ndërhyjë urgjentisht ndaj sulmeve të Izraelit kundër popullit të Palestinës në Rripin e Gazës dhe Bregun Perëndimor.

"Në kohën kur Izraeli po kryen çdo ditë masakra kundër popullit të Palestinës në Rripin e Gazës, forcat pushtuese dhe kolonialistët terroristë vazhdojnë krimet e tyre të përditshme me bastisjet dhe ekzekutimet e tyre në terren kundër qyteteve, qytezave dhe kampeve palestineze në Bregun Perëndimor", deklaroi Abu Rudeineh për agjencinë zyrtare palestineze të lajmeve WAFA.

"Izraeli po kryen terror në çdo vend kundër popullit palestinez", tha Abu Rudeineh duke i bërë thirrje OKB-së të ndërhyjë menjëherë për të ndaluar gjakderdhjen palestineze dhe këtë sulm gjithëpërfshirës që kryhet nën hijen e heshtjes ndërkombëtare të paprecedentë.

Duke mbajtur përgjegjës administratën e SHBA-së për përshkallëzimin e tensioneve, zëdhënësi palestinez bëri thirrje që t'i bëhet presion Izraelit për të ndalur sulmet kundër popullit palestinez në Gaza, Kudsin Lindor dhe Bregun Perëndimor.

"Këto sulme nuk do të sjellin qetësi dhe siguri për askënd", theksoi Abu Rudeineh i cili përsëriti se Izraeli dhe SHBA-ja nuk kanë opsion tjetër veçse të ndalin sulmet dhe t'i japin fund pushtimit.

Ai vuri në dukje se dështimet e zgjidhjeve ushtarake janë provuar dhe se zgjidhja e vetme është njohja e lirisë dhe pavarësisë së popullit të Palestinës në përputhje me legjitimitetin dhe ligjin ndërkombëtar.

Burimi: AA