Osmani në fjalimin e fundvitit para deputetëve: Politika e sotme e Vuçiqit është politika e djeshme e Milosheviqit

Friday, 15 December 2023 13:53

• Written by AA

Presidentja e Kosovës, Vjosa Osmani, ka mbajtur adresimin e fundvitit para deputetëve të Kuvendit të Kosovës.

Në fjalën e presidentes në këtë seancë ku nuk ishin të pranishëm deputetët e opozitës nga Partia Demokratike e Kosovës (PDK) dhe as nga Aleanca për Ardhmërinë e Kosovës (AAK).

Osmani, e cila u fokusua në sfidat e sigurisë, tha se po u flet deputetëve në fund të një viti shumë të vështirë për vendin pas sulmit terrorist të 24 shtatorit. Ajo tha se ky sulm ekspozoi sërish fytyrën e Serbisë, "ëndërr e të cilës mbetet ideja e botës serbe".

“Sulmi i 24 shatorit është po ashtu tregues i qartë se Serbia dhe nomenkaltura aktuale e saj nuk është e interesuar as për paqe të qëndrueshme as për fqinjësi të mirë, as për përmbyllje të procesit të dialogut me Kosovën. Fatkeqësisht politika e sotme e Vuçiqit është politika e djeshme e Milosheviqit. Prandaj, ambiciet hegjemoniste nuk kanë marrë fund. Banjska ishte vetëm një paralajmërim, e Serbia nuk do të heq dorë nga planet e saj të errëta”, theksoi Osmani.

Rruga drejtë sigurisë së vendit, Osmani tha se është ajo e anëtarësimit në NATO dhe Bashkimin Evropian (BE).

Sipas saj, situata sikurse ajo e 24 shtatorit nuk duhet t’i ndajë shqiptarët në parti politike apo në dallime ideologjike.

Duke folur për dialogun, Osmani tha se ky proces po bëhet gjithnjë e më i vështirë për shkak të jo-konstruktivitetit dhe pengesave të Serbisë, e cila dëshiron të shkaktojë destabilizim jo vetëm në Kosovë, por edhe më gjerë.

“Mungesa e balancimit dhe qasjes së trajtimit të barabartë në dialog i ka bërë dëm jashtëzakonisht të madh këtij procesi. Kosova akoma përballet me masa të padrejta jo-proporcionale të cilat prekin drejtpërdrejtë interesin e qytetarëve të saj. Në anën tjetër, duke mos vendosur masa ndaj Serbisë për aktin e agresionit të 24 shtatorit dhe për sulmin ndaj ushtarëve të KFOR-it dhe gazetarëve përgjatë majit, për fat të keq ky shtet vetëm po inkurajohet që të vazhdojë të përdorë dhunë. Një trajtim i tillë i pabarabartë i palëve do të jetë një goditje për vet kredibilitetin e procesit të dialogut dhe pengesa kryesore për suksesin e këtij procesi”, theksoi Osmani.

Osmani tha se Kosova nuk mund të pajtohet gjithmonë me bashkësinë ndërkombëtare për çdo çështje, por theksoi se mosmarrëveshjet duhet të zgjidhen me respekt të ndërsjellë.

Ajo po ashtu ka theksuar se Kosova duhet të qëndrojë gjithmonë pranë Shqipërisë, pavarësisht dallimeve që mund të ekzistojnë.

Osmani ka bërë thirrje që për krijimin e Asociacionit të komunave me shumicë serbe të bashkohen të gjithë pa dallime partiake për ta formuar në përputhje me Kushtetutën e Kosovës, e jo të jetë me kompetenca.

Ajo ka folur edhe për shqiptarët në Luginën e Preshevës, ku theksoi se ka qenë e pafalshme që për vite procedurat për marrje të shtetësisë për shqiptarët nga Lugina, kanë qenë të njëjta me ato që vlejnë për qytetarë nga kontinentet e largëta.

Në këtë seancë morën pjesë ambasadorët e vendeve të rajonit dhe BE-se, si dhe ai i SHBA-së.

Burimi: AA

BE: Kosova dhe Serbia të zbatojnë pa vonesa marrëveshjen e Ohrit

Tuesday, 12 December 2023 20:59

• Written by VOA

Bashkimi Evropian pritet t’u kërkojë Kosovës dhe Serbisë zbatimin e marrëveshjes për normalizimin e marrëdhënieve të arritur më herët gjatë këtij viti në Bruksel dhe në Ohër, ndërsa synon ta shndërrojë atë në pjesë të kuadrit negociues të Serbisë për anëtarësim në bllok dhe të hapave të Kosovës drejt integrimeve.

Ministrat për çështje evropiane të vendeve të Bashkimit Evropian po diskutojnë të martën për paketën e zgjerimit të bllokut dhe në këtë kuadër pritet miratimi i përfundimeve, për të cilat më vonë gjatë javës do të diskutohet në takimin e nivelit të lartë të vendeve anëtare.

Në pjesën për Kosovën në dokumentin që e ka parë Zëri i Amerikës dhe i cili është versioni i fundit që u është dorëzuar ministrave para takimit të sotëm, vendin qendror e zënë situata e sigurisë në komunat veriore të saj të banuara me shumicë serbe dhe bisedimet me Serbinë.

“Këshilli është thellësisht i shqetësuar për situatën në veri të Kosovës, duke përfshirë sigurinë. Disa veprime të njëanshme të Kosovës dhe Serbisë, si dhe dorëheqja kolektive e serbëve të Kosovës nga institucionet e Kosovës dhe bojkotimi i zgjedhjeve lokale të prillit në veri kanë rritur edhe më tej tensionet. Këshilli dënon ashpër aktet e dhunshme të protestuesve serbë të Kosovës kundër qytetarëve, trupave të KFOR-it, forcave të rendit dhe mediave më 29 maj 2023”, thuhet mes tjerash në projekt përfundime në të cilat theksohet se zgjedhjet e reja lokale në veri të Kosovës duhet të mbahen sa më shpejt që të jetë e mundur dhe serbët e Kosovës duhet të marrin pjesë pa parakushte. Po ashtu thuhet aty, serbët e Kosovës duhet të kthehen në institucionet që i kanë braktisur dhe ky kthim duhet të lehtësohet nga Kosova dhe të inkurajohet nga Serbia.

Bashkimi Evropian vendosi masa ndëshkuese ndaj Kosovës pas tensioneve të muajit maj duke kërkuar hapa për uljen e tensioneve. Në projekt përfundime thuhet se blloku është i gatshëm t’i heqë masat ndëshkuese nëse “në rast të përparimit të mëtejshëm në përmbushjen e kërkesave” për shtensionim, duke vlerësuar disa nga hapat e hedhur nga qeveria e Kosovës e cila uli praninë e forcave policore në komunat veriore dhe miratoi bazën ligjore për organizimin e zgjedhjeve të reja.

Në dokument thuhet se “Këshilli rithekson se nuk ka arsyetim për dhunën dhe dënon fuqishëm sulmin e dhunshëm kundër Policisë së Kosovës më 24 shtator 2023”. Kosova dhe Serbia thuhet më tej, duhet të bëjnë përpjekje të qëndrueshme për uljen e tensioneve, të përmbahen nga veprimet e njëanshme dhe provokuese që mund të çojnë në tensione dhe dhunë dhe të ndalojnë retorikën nxitëse, ndërsa paralajmërohet se “dështimi i palëve për të ulur tensionet do të ketë pasoja”.

“Këshilli pret që Kosova dhe Serbia të gjejnë një zgjidhje të qëndrueshme për situatën në veri të Kosovës që garanton siguri dhe demokraci pjesëmarrëse për të gjithë qytetarët”, thuhet në dokument, në të cilin shprehet keqardhje që palët nuk i kanë zbatuar zotimet e marra në marrëveshjen e arritur në shkurt dhe në mars në Bruksel dhe në Ohër.

“Këshilli kërkon nga Kosova dhe Serbia që në tërësi dhe pa vonesa t’i zbatojnë ato. Kjo përfshin edhe themelimin e Asociacionit të komunave me shumicë serbe. Këshilli mirëpret gatishmërinë e Kosovës dhe Serbisë për të pranuar projekt-statutin (e Asociacionit) të paraqitur nga lehtësuesi i BE-së, që nënkupton se puna e mëtejme duhet të bëhet në bazë të tij”, thuhet në tekstin e përfundimeve.

Në pjesën për Serbinë, përfshihet thirrja që Komisioni Evropian dhe Shefi i politikës së Jashtme sa më parë, më së voni deri në janar të vitit 2024, të propozojë ndryshimin e kritereve të kuadrit negociues të Serbisë për anëtarësim në bllok për të përfshirë edhe detyrimin e saj për zbatimin e Marrëveshjes për normalizimin e marrëdhënieve me Kosovën

Presidenti serb, Aleksandar Vuçiq, ka përsëritur disa herë ditëve të fundit se ka mundësi që Marrëveshja e Ohrit të bëhet pjesë e negociatave për anëtarësim.

Marrëveshja për të cilën palët u pajtuan me 27 shkurt në Bruksel dhe më 18 mars në Ohër, kërkon marrëdhënie të mira fqinjësore ndërmjet Kosovës dhe Serbisë, njohje të dokumenteve dhe simboleve dhe respektim të sovranitetit dhe tërësisë tokësore të njëra tjetrës. Ajo kërkon që palët të mos pengojnë njëra tjetrën në proceset integruese, por nuk kërkon njohje të ndërsjellë. Plani parasheh edhe përmbushjen e të gjitha marrëveshjeve të arritura më parë në bisedimet e ndërmjetësuara nga Bashkimi Evropian.

Por, presidenti serb Vuçiç, ritheksoi se për Serbinë është e papranueshme që Kosova “të anëtarësohet në Kombet e Bashkuara”.

Të gjashtë vendet e Ballkanit Perëndimor aspirojnë integrimet evropiane. Të mërkurën udhëheqësit e këtyre vendeve pritet të takohen në Bruksel me drejtuesit e Bashkimit Evropian për të diskutuar rrugën dhe kushtet drejt integrimeve evropiane.

Në projekt përfundimet e Këshillit përgëzohen vendet që kanë harmonizuar politikën e jashtme me Bashkimin Evropian, ndërsa shpalosen pritjet që “Serbia të shtojë përpjekjet e saj drejt përafrimit të plotë me pozicionet e Politikës së Përbashkët të Jashtme dhe të Sigurisë së BE-së dhe masat kufizuese, duke përfshirë Rusinë dhe Bjellorusinë, si një çështje me përparësi”.

Serbia ka refuzuar t’u bashkohet sanksioneve kundër Moskës për shkak të agresionit të saj në Ukrainë, në radhë të parë për shkak të mbështetjes së Kremlinit ndaj pretendimeve serbe ndaj Kosovës, pavarësinë e së cilës Beogradi vazhdon ta kundërshtojë./VOA

5 milionë euro për familjet në nevojë në Kosovë, Kurti: Dimri të kalohet sa më lehtë

Wednesday, 06 December 2023 21:10

• Written by Express

Ministria e Financave ka prezantuar masën 1.2 për zbutjen e ndikimit të menjëhershëm socio-ekonomik të krizës energjetike përmes mbështetjes shtesë për blerjen e lëndëve djegëse për ngrohje gjatë dimrit për familjet përfituese të asistencës sociale.

Subvencionimi do të bëhet përmes llogarive bankare të familjeve përfituese. Janë 21 mijë familje me 81 mijë anëtarë përfitues. Shuma totale e subvencionimit është pesë milionë euro, derisa masa është mbështetur nga Bashkimi Evropian.

Kryeministri Albin Kurti tha se po mbështesin familjet me asistencë sociale për blerjen e lëndëve djegëse. Ai përmendi të arriturat e kësaj Qeverie sa i përket mirëqenies së qytetarëve.

“Shumë sfida i kemi kaluar dhe i kemi shndërruar në arritje. Varësisht nga rrethana mund të ndryshoj rrethana po asnjëherë cakun. Përkrahëm me 1.4 milion euro katër kuzhina popullore 36 mijë pako ushqimore. Qysh në vitin e parë të Qeverisë tonë e formuar kujdesimin e nënave e lehonave. Aktualisht jemi në proces të sipër të subvencionimit të energjisë elektrike”.

“Me 5 milionë euro mundësohet subvencionimi i lëndës djegëse për ngrohje në mënyrë që dimri të kalohet sa më lehtë”, ka shtuar ai.

“Sot jemi bashkë për ta prezantuar edhe një masë e cila në qendër ka grupe të cenueshme të shoqërisë ata që kanë nevojë më së shumti për dorën e shtetit. 5 milionë euro kemi nda, ku qeveria do të mundësojë masën për blerjen e lëndëve djegëse për familjet me asistencë sociale. Jemi dhe do të mbetemi qeveri që udhëheq e mbështet dhe nuk lë askënd mbrapa”.

Ministri i Financave Hekuran Murati tha se në kuadër të kësaj mase për një familje katër anëtarësh do të jepen 120 euro dhe 30 euro për çdo anëtarë të familjes.

Përfitues të kësaj mase, siç tha Murati, do të jenë familjet me asistencë sociale.

“Masa më e fundit është kjo për familjet me asistencë sociale ku do të përftojnë për mbështetje shtesë për blerjen e lëndës djegëse, për stinën e dimrit. Pakoja energjetike emergjente është mbështetur nga Bashkimi Evropian. Janë 5 milionë euro të alokuara për këtë masë”.

“Qendrat për punë sociale i kanë familjet me asistencë sociale. Për një familje katër anëtarësh janë 120 euro dhe 30 euro për çdo anëtar të familjes, që i bien gjithsej 240 euro për një familje katër anëtarësh. Ai po ashtu tha se janë në proces të verifikimit të familjeve, ku janë diku 21 mijë familje”./Express

Turqia dënon sulmin ndaj policisë në veri të Kosovës

Sunday, 24 September 2023 22:18

• Written by AA

Ministria e Jashtme e Türkiyes, ka dënuar sulmin në veri të Kosovës nga një grup i armatosur, në të cilin ka mbetur i vrarë një pjesëtar i Policisë së Kosovës.

“E dënojmë sulmin e mëngjesit të sotëm (24 shtator) në fshatin Banjskë të Komunës së Zveçanit me shumicë serbe në veri të Kosovës, që rezultoi në vdekjen e një polici të Kosovës dhe plagosjen e policëve të tjerë”, tha zëdhënësi i Ministrisë, Tanju Bilgiç, në një deklaratë në përgjigje ndaj një pyetjeje në lidhje me zhvillimet e sotme.

“Të plagosurve u urojmë shërim të shpejtë”, ka shtuar Bilgiç.

“Për të ulur tensionin në rajon dhe për të parandaluar përshkallëzimin, është e domosdoshme që të gjitha palët të veprojnë me përmbajtje dhe të evitojnë dhunën. Dialogu është mënyra e vetme për të arritur paqen dhe stabilitetin e qëndrueshëm në Kosovë dhe rajon. Si Türkiye, ne do të vazhdojmë të mbështesim procesin e dialogut”, thuhet në deklaratë.

Rreth orës 3:00 të mëngjesit, në Banjskë të Zveçanit, të banuar me shumicë serbe, një zyrtar policor mbeti i vrarë dhe një tjetër i plagosur pas sulmit të një grupi të armatosur ndaj njësitit policor në veri. Pas sulmit ndaj tyre u bë e ditur se zyrtari policor i vrarë ka qenë polic i rendit me gradën rreshter, kurse i plagosuri është pjesëtar i policisë kufitare.

Pas mbledhjes së Këshillit të Sigurisë, kryeministri i Kosovës, Albin Kurti, tha se sulmet ndaj zyrtarëve policorë në dhe rreth Manastirit në Banjskë të Zveçanit po vazhdojnë ende nga rreth 30 persona të armatosur rëndë.

Policia e Kosovës ka konfirmuar tre sulmues të vrarë deri më tani.

Burimi: AA