Kryeministri i Kosovës, Albin Kurti ka deklaruar se vendimi i fundit i Gjykatës Speciale, e cila e shtyu me dy muaj dhënien e vendimit për ish krerët e UÇK-së, nuk ka lidhje me zgjedhjet që do të zhvillohen në 7 qershor në Kosovë. Gjatë një deklarate për mediat, Kurti u shpreh se Qeveria e Kosovës nuk ka akses te kjo gjykatë.
Avokati i Popullit i Kosovës, Naim Qelaj, u ka dërguar një letër shteteve financuese të Dhomave të Specializuara të Kosovës, përfshirë edhe Shtetet e Bashkuara të Amerikës dhe vende të tjera partnere, duke iu përcjellë raportin “Vlerësimi paraprak i Dhomave të Specializuara të Kosovës” të organizatës britanike “Bar Human Rights Committee of England and Wales” (BHRC), si dhe shqetësimet e ngritura mbi bazën e tij.
Serbia dhe Izraeli kanë thelluar bashkëpunimin ushtarak përmes një marrëveshjeje për shkëmbimin dhe mbrojtjen e të dhënave sekrete në fushën e mbrojtjes. Autoritetet serbe thonë se marrëveshja krijon kushte për bashkëpunim në industrinë e mbrojtjes, por nuk japin detaje konkrete. Opozita e ka kritikuar këtë afrim, duke e cilësuar të papërshtatshëm për shkak të operacioneve të Izraelit në Gazë dhe përfshirjes së tij në konfliktin me Iranin. Presidenti Aleksandar Vuçiq është përgjigjur se Serbia bashkëpunon si me Iranin, ashtu edhe me Izraelin, dhe se nuk i jep llogari askujt për këtë politikë.
Partia Demokratike e Kosovës ka shprehur shqetësim për shtyrjen e shpalljes së aktgjykimit në procesin gjyqësor ndaj ish-krerëve të UÇK në Gjykatën Speciale.
Kreu i LDK-së, Lumir Abdixhiku, ka konfirmuar se partia që drejton ka arritur dakordim për bashkëpunim politik me Vjosa Osmanin për zgjedhjet e ardhshme.
