Deputeti ukrainas Oleksiy Goncharenko ka kritikuar presidentin Volodymyr Zelenskyy për deklaratën e bërë gjatë vizitës në Beograd, ku ai rikonfirmoi se Ukraina nuk e ndryshon qëndrimin e saj për mosnjohjen e Kosovës. Goncharenko e cilësoi këtë pozicion si një “gabim diplomatik” dhe deklaroi se do të vazhdojë të kërkojë njohjen e Kosovës nga Kievi.
Presidenti serb Aleksandar Vuçiq ka deklaruar se Serbia po shqyrton mundësinë e ndryshimit të rrjedhës së lumit Ibër, duke bërë të ditur se janë angazhuar ekspertë dhe inxhinierë për të analizuar një skenar të tillë. Ai e lidhi idenë drejtpërdrejt me situatën e serbëve në Kosovë dhe deklaroi se Beogradi do të shohë “çfarë do të bëjnë shqiptarët” nëse Serbia vendos të veprojë.
Kryeministri në detyrë i Kosovës dhe kryetari i Lëvizjes Vetëvendosje, Albin Kurti, ka ftuar në takime të ndara drejtuesit e tri partive kryesore opozitare, Bedri Hamzën e PDK-së, Lumir Abdixhikun e LDK-së dhe Ardian Gjinin e Aleancës, në përpjekjen e fundit për të siguruar formimin e institucioneve të dala nga zgjedhjet e 7 qershorit.
Zyra e Prokurorit të Specializuar ka kërkuar që Hashim Thaçi të vazhdojë të mbahet në paraburgim, duke kundërshtuar kërkesën e mbrojtjes së tij për lirim të përkohshëm me kusht. Mbrojtja e ish-presidentit të Kosovës i kërkoi gjyqtarit lirimin e tij në çështjen që lidhet me akuzat për pengimin e administrimit të drejtësisë. Në kërkesën e datës 6 korrik, avokatët ofruan një garanci financiare prej 50 mijë eurosh, të siguruar nga një vëlla dhe dy miq të afërt të Thaçit.
Gazetari Berat Buzhala i ka kërkuar publikisht Prokurorisë së Kosovës që të hetojë aktivitetin e grupimit të njohur si “Lëvizja e Deçanit” ose “Lëvizja për Rikthim”, duke ngritur dyshime se disa nga deklaratat dhe postimet e tij mund të përmbajnë elemente të nxitjes së urrejtjes ndaj besimit islam dhe qytetarëve myslimanë.
