Vuçiq i gatshëm për antarësimin e Serbisë në BE pa të drejtë vetoje
Presidenti i Serbisë, Aleksandar Vuçiq, ka deklaruar se do të pajtohej me anëtarësimin e Serbisë në Bashkimin Evropian që nuk do të ishte i plotë, duke theksuar se për të më e rëndësishme është qasja në tregun e përbashkët dhe lëvizja e lirë e njerëzve.
Duke folur për gazetën gjermane "Frankfurter Allgemeine Zeitung", Vuçiq tha se anëtarësimi në BE pa të drejtën e vetos, për Serbinë është i pranueshëm.
Kosova në tryezën globale të paqes: Osmani merr pjesë në nismën 5 miliardë $ për Gazën
Presidentja e Kosovës, Vjosa Osmani, do të marrë pjesë në ceremoninë e Bordit të Paqes më 19 shkurt në Uashington, siç konfirmoi për Radion Evropa e Lirë këshilltari i saj Bekim Kupina. Ceremonia do të zhvillohet në Institutin për Paqe të Trumpit, ndërsa vetë Donald Trump ka njoftuar se vendet anëtare janë zotuar për mbi 5 miliardë dollarë për rindërtimin dhe ndihmën humanitare në Gazë, si dhe për angazhimin e mijëra trupave në një Forcë Ndërkombëtare Stabilizuese për garantimin e sigurisë.
Presidenca e Kosovës theksoi se vendi mbetet i përkushtuar të bashkëpunojë me SHBA-në dhe Bordin e Paqes për stabilitet në zonat e konfliktit, ndërsa sqaroi se Kosovës nuk i është kërkuar pagesa prej 1 miliard dollarësh. Bordi, i themeluar më 22 janar në Davos me 27 anëtarë, është autorizuar nga Këshilli i Sigurimit i OKB-së të mbikëqyrë armëpushimin dhe rindërtimin në Gazë, në kuadër të planit 20-pikësh të Trumpit, të pranuar nga Izraeli dhe Hamasi në tetor 2025.
Eksperti i studimeve për paqe, Gëzim Visoka, vlerëson se pjesëmarrja mund t’i sjellë Kosovës përfitime diplomatike dhe hapësirë për lobim ndërkombëtar, sidomos për sa kohë vendi mbetet jashtë NATO-s, BE-së dhe OKB-së. Ndërkohë, autoritetet kosovare po shqyrtojnë edhe mundësinë e kontributit të Forca e Sigurisë së Kosovës në Forcën Ndërkombëtare Stabilizuese, e cila pritet të ketë mandat për sigurinë dhe mbikëqyrjen e armëpushimit në Rripin e Gazës.
Vuçiç shpërthen ndaj Perëndimit: “Kosova hapi Kutinë e Pandorës së rendit botëror!”
Në 18-vjetorin e shpalljes së Pavarësisë së Kosovës, Presidenti i Serbisë, Aleksandar Vučić, reagoi me një deklaratë të fortë gjatë një interviste për mediat serbe, të dhënë në kuadër të një vizite zyrtare në Indi.
Vuçiç u shpreh se me njohjen e pavarësisë së Kosovës “u hap Kutia e Pandorës e padrejtësisë dhe e shkatërrimit të shteteve sovrane”, duke e cilësuar atë një precedent me pasoja të rënda globale.
“Është mirë të analizohet pas 18 vitesh se sa katastrofike ishin pasojat, jo vetëm për Serbinë, jo vetëm për rajonin, por edhe për Evropën dhe botën ato vendime tepër të gabuara,” tha ai.
Presidenti serb akuzoi drejtpërdrejt NATO-n, Evropën dhe Shtetet e Bashkuara për vendimet e marra në vitet 1999 dhe 2008, duke deklaruar se “me vendimin e të fuqishmëve, të cilët në atë kohë as nuk interesoheshin për të drejtën ndërkombëtare”, u vendos një standard i ri në marrëdhëniet ndërkombëtare.
“Ata mendonin se ishin të gjithëpushtetshëm dhe të plotfuqishëm, se ishin përfaqësues të Zotit, të cilët me mjetet, armët dhe pasurinë e tyre të madhe mund të shpërndanin drejtësi me zjarr dhe shpatë ashtu siç dëshironin,” u shpreh Vuçiç.
Ai shtoi se vendet që mbështetën pavarësinë e Kosovës “duhet të shpjegojnë dhe të përdorin të njëjtat argumente që përdorëm ne 18 ose 27 vjet më parë”, duke argumentuar se “fillimi i rënies së rendit botëror ishte në atë periudhë midis viteve 1999 dhe 2008”.
Megjithatë, Vuçiç pranoi se Serbia ka bërë edhe gabime të brendshme në vitet ’90 dhe 2000, duke përmendur “angazhimin e pamjaftueshëm” dhe “konfliktet e brendshme që prodhuan tensione”, si edhe mungesën e një lidershipi të fortë në atë kohë.
“Kanë kaluar 18 vjet, çdo vit po bëhet më e vështirë, por ata nuk arritën ta thyenin Serbinë,” përfundoi ai.
Vendimi afrohet: Thaçi dhe të tjerët sot përballë fjalës së fundit në Hagë
Procesi gjyqësor ndaj ish-krerëve të UÇK-së në Dhomat e Specializuara të Kosovës vijon këtë të mërkurë me një nga momentet më të rëndësishme të tij: paraqitjen e deklaratave përmbyllëse.
Në seancën e sotme do të paraqiten fillimisht përfaqësuesi i viktimave dhe ekipet mbrojtëse, ndërsa më pas fjalën do ta marrin vetë të akuzuarit – Hashim Thaçi, Kadri Veseli, Rexhep Selimi dhe Jakup Krasniqi. Pas pushimit të drekës, secili prej tyre do t’i drejtohet trupit gjykues me një fjalim prej 20 minutash.
Në seancën përmbyllëse pritet të jetë i pranishëm edhe zëvendëskryeministri i parë i Kosovës, Glauk Konjufca. Në seancën e fundit, pas deklaratave përmbyllëse të mbrojtjes së Jakup Krasniqit, trupi gjykues dhe prokuroria u drejtuan palëve me pyetje shtesë.
Pas përfundimit të deklaratave përmbyllëse, çështja do të kalojë për vendimmarrje. Gjykatësit kanë afat deri në tre muaj për të shpallur vendimin ose për të kërkuar shtyrje të afatit. Prokuroria Speciale ka kërkuar dënimin e katër ish-krerëve me nga 45 vite burg secilit.
Kurti kërkon gjykatë speciale për “Sarajevo Safari”: “Shtëpia e verdhë” narrativë hibride kundër UÇK-së
Në 18-vjetorin e Pavarësisë së Kosovës, kryeministri Albin Kurti lëshoi një mesazh të fortë politik dhe juridik, duke kërkuar themelimin e një gjykate speciale ndërkombëtare për hetimin e krimeve të njohura si “Sarajevo Safari” apo “turizmi i snajperëve” gjatë rrethimit të Sarajevës në fillim të viteve ’90. Sipas Kurtit, bazuar në informacione të qarkulluara ndër vite, persona të ndryshëm paguanin shuma parash për të qëlluar me snajperë civilë boshnjakë nga kodrat përreth qytetit të rrethuar, ndërsa në këtë fenomen “thuhet të ketë pasur rol” edhe presidenti i Serbisë, Aleksandar Vuçiq. Kurti theksoi se krime të tilla kërkojnë hetim dhe gjykim ndërkombëtar, duke nënvizuar përgjegjësinë e komunitetit ndërkombëtar për të mos lejuar standarde të dyfishta në trajtimin e krimeve të luftës në rajon.
Në të njëjtën linjë, Kurti hodhi poshtë kategorikisht narrativën e ashtuquajturës “shtëpia e verdhë” për trafikim organesh në Shqipëri, duke deklaruar se ajo “nuk ka ekzistuar kurrë” dhe se përbën një konstrukt politik e propagandistik kundër UÇK-së dhe Shqipërisë. Sipas tij, kjo histori është përdorur për të relativizuar krimet e kryera nga regjimi serb dhe për të njollosur luftën çlirimtare të Kosovës.
Duke iu referuar procesit në Hagë ndaj ish-krerëve të UÇK-së, Kurti theksoi se gjykimi është në zhvillim dhe do të ndjekë rrugën ligjore, por ai “nuk mund dhe nuk do të ndryshojë” karakterin çlirimtar të luftës së UÇK-së. Sipas tij, lufta ishte përgjigje ndaj represionit sistematik ndaj shqiptarëve të Kosovës dhe nuk përbënte projekt pushteti apo ambicie territoriale. Konferenca shkencore e organizuar nga Instituti i Krimeve të Kryera gjatë Luftës në Kosovë, ku u mbajt ky fjalim, synon dokumentimin e krimeve dhe thellimin e debatit akademik mbi pasojat e luftës, duke theksuar nevojën për përgjegjësi të plotë ndërkombëtare dhe trajtim të barabartë të të gjitha krimeve të kryera në Ballkan.