Zelensky urdhëron ushtrinë të rrisë sulmet me 1,000 dronë në ditë kundër Rusisë

Sunday, 30 August 2026 08:41

• Written by /Euronews.al

Presidenti ukrainas Volodymyr Zelensky  tha se kishte urdhëruar forcat e armatosura të vendit të rrisnin sulmet me dronë me rreze të gjatë veprimi kundër Rusisë në 1,000 në ditë, nga rreth 300 që janë aktualisht.

“Duhet të ketë më shumë: ekziston një qëllim specifik dhe ne do ta përmbushim këtë detyrë”, tha ai në një fjalim pasdite.

Prodhimi i benzinës në Rusi ra në rreth 70% të niveleve të kërkesës së brendshme në fund të gushtit, pasi një seri sulmesh me dronë ukrainasë detyruan rafineritë kryesore të pezullojnë operacionet, thanë dy burime të industrisë.

Ukraina ka shtuar sulmet ndaj infrastrukturës energjetike ruse në një përpjekje për të ulur të ardhurat e Moskës nga eksporti i naftës. Mungesa e karburantit goditi përsëri rajonet ruse në gusht pas një pushimi të shkurtër në fund të korrikut, kur disa autoritete lokale filluan të lehtësojnë ose heqin kufizimet në shitjen e karburantit.

Prodhimi i benzinës në fund të gushtit ra në të njëjtin nivel që ishte në fillim të korrikut, thanë burimet.

Javën e kaluar, pas sulmeve nga dronë ukrainasë, disa rafineri të mëdha, të cilat janë të gjitha njësi të rëndësishme të prodhimit të benzinës, duke përfshirë ato në qytetin e Permit, Nizhny Novgorod dhe Yaroslavl, pushuan së funksionuari.

U arrestua bashkë me Agasin, Uljan Shpataraku me 3 pistoleta, 2 shotgun dhe 2 pushkë në banesë

Sunday, 30 August 2026 08:27

• Written by /JOQ

Detaje të reja dalin në dritë për Uljan Shpatarakun, ish-efektivin e Policisë së Shtetit, i cili u arrestua në flagrancë teksa shoqëronte me automjet Ergys Agasin, personin e shpallur në kërkim prej muajsh nga SPAK.

Pas arrestimit, autoritetet i kanë hequr Shpatarakut lejen e armës, ndërsa gjatë kontrolleve në banesën e tij është sekuestruar një arsenal prej shtatë armësh, të cilat i mbante me leje. Bëhet fjalë për 3 pistoleta, 2 shotgun dhe 2 pushkë.

Sipas të dhënave, procedurat për heqjen e lejes së armës kishin nisur që përpara arrestimit, pasi Shpataraku ishte përjashtuar nga radhët e Policisë së Shtetit disa javë më herët. Gjatë verifikimeve të kryera në kuadër të këtyre procedurave, autoritetet kanë evidentuar edhe armët që ish-efektivi mbante në banesë.

Shpataraku është përmendur më herët si një person i afërt me ish-drejtorin e Përgjithshëm të Policisë së Shtetit, Ilir Proda. Emri i tij u rikthye në vëmendje më 26 gusht, kur u arrestua ndërsa drejtonte një automjet tip “Audi”, në të cilin ndodhej Ergys Agasi.

Agasi ishte në kërkim prej më shumë se tetë muajsh nga SPAK, në kuadër të hetimeve për dosjen që lidhet me tenderët e AKSHI-t. Arrestimi i tij në zonën e Plepave i dha fund arratisë disa mujore.

Por hetimet ndaj Shpatarakut nuk lidhen vetëm me armët. Për ish-efektivin raportohet se autoritetet kanë edhe indicie për ekzistencën e një precedenti penal jashtë Shqipërisë, të cilin ai dyshohet se nuk e ka deklaruar.

Kështu, për ish-punonjësin e Policisë së Shtetit po verifikohen disa elementë, nga arsenali i armëve të sekuestruara në banesë, te rrethanat e shoqërimit të Ergys Agasit dhe të dhënat që lidhen me një precedent të mundshëm të padeklaruar jashtë vendit.

“Ul ndjeshëm çmimet për amerikanët”/ Trump përshëndet marrëveshjen për naftën: Popullit venezuelian do i sjellë 100 miliardë $ investime private

Sunday, 30 August 2026 08:15

• Written by /BallkanWeb

Shtetet e Bashkuara kanë arritur një marrëveshje me Venezuelën për të kontrolluar më shumë se 65 miliardë fuçi rezerva të provuara nafte, njoftoi presidenti amerikan Donald Trump.

“Ky transaksion historik më shumë se dyfishon rezervat amerikane të naftës, rrit ndjeshëm furnizimin tonë dhe do të ulë ndjeshëm çmimet e benzinës për të gjithë amerikanët”, shkroi Trump në rrjetet sociale.

Marrëveshja u përshëndet edhe nga presidentja e përkohshme e Venezuelës, Delcy Rodriguez, e cila e cilësoi atë si një hap të rëndësishëm për rimëkëmbjen ekonomike të vendit.

Trump është zotuar të shfrytëzojë rezervat e Venezuelës, të cilat konsiderohen më të mëdhatë në botë, pasi Shtetet e Bashkuara kapën presidentin e atëhershëm Nicolás Maduro këtë vit. Administrata amerikane është përballur së fundmi edhe me presion për uljen e çmimeve të benzinës në vend, të cilat janë rritur ndjeshëm si pasojë e konfliktit me Iranin.

Sekretari amerikan i Shtetit, Marco Rubio, e cilësoi marrëveshjen si “një fitore të madhe si për popullin amerikan, ashtu edhe për atë venezuelian”. Megjithatë, deri tani janë bërë publike pak detaje mbi kushtet e saj.

Sipas Rubio, marrëveshja pritet të sjellë afro 100 miliardë dollarë investime private në Venezuelë, të mbështesë mijëra vende pune me paga të larta dhe të kontribuojë në rindërtimin e ekonomisë së vendit.

Trump deklaroi se Rubio dhe Sekretari i Mbrojtjes, Pete Hegseth, e kanë finalizuar marrëveshjen me autoritetet venezueliane “përmes një partneriteti me biznesin privat”. Presidenti amerikan nuk dha detaje mbi kompanitë e përfshira, kushtet e marrëveshjes apo detyrimet që do të kenë palët, por theksoi se ajo është arritur “pa asnjë kosto për taksapaguesit amerikanë”.

17 fusha nafte dhe koncesion 100-vjeçar

Sipas Delcy Rodriguez, marrëveshja parashikon zhvillimin e 17 fushave strategjike të naftës, me rezerva të provuara prej rreth 65 miliardë fuçish.

Ajo tha se projekti do të shoqërohet me më shumë se 100 miliardë dollarë investime dhe rreth 209 miliardë dollarë të ardhura nga taksat për shtetin venezuelian.

“Këto investime do të kontribuojnë jo vetëm në rimëkëmbjen dhe modernizimin e industrisë sonë, por edhe në rritjen ekonomike të vendit, sigurinë energjetike të hemisferës dhe një ekuilibër më të madh në tregjet ndërkombëtare”, deklaroi Rodriguez.

Sipas një zyrtari amerikan, qeveria e SHBA-së do të kontrollojë 55% të një sipërmarrjeje të përbashkët me një “operator privat me përvojë në Venezuelë”. Zyrtari i bëri këto deklarata për CBS News, partnerin mediatik të BBC-së.

Rodriguez i ka dhënë kësaj sipërmarrjeje një koncesion 100-vjeçar për operimin në fushat e naftës, sipas të njëjtit zyrtar.

Marrëveshje e pazakontë për burimet sovrane

Trump ka dhënë relativisht pak detaje mbi marrëveshjen, e cila për nga përmasat dhe struktura paraqitet si një zhvillim jashtëzakonisht i pazakontë në marrëdhëniet ndërkombëtare. Në praktikë, ajo duket se i jep Shteteve të Bashkuara një rol të drejtpërdrejtë në administrimin dhe shfrytëzimin e burimeve natyrore të një shteti të huaj.

Marrëveshja duket gjithashtu se shkon përtej modelit të përdorur nga Autoriteti i Përkohshëm i Koalicionit, i drejtuar nga SHBA-të, mbi të ardhurat e naftës së Irakut pas rrëzimit të Saddam Husseinit në pushtimin e vitit 2003.

“Flota hije” e Putinit troket në Durrës: Shqipëria ndal tankerin e dyshuar rus

Saturday, 29 August 2026 17:34

• Written by Mexhis

Kapiteneria e Portit të Durrësit bën me dije se ka ndaluar dje, më 28 gusht, hyrjen në radën e portit të anijes “Hanuman”, një tanker me numër IMO 9295048, që lundron nën flamurin e Sierra Leones.

Read more ...