Shmangën detyrimet tatimore duke shkaktuar 2 milionë euro dëm ekonomik, arrestohen 12 persona në Tiranë

Wednesday, 20 December 2023 15:32

• Written by Lapsi.al

Policia e Tiranës ka arrestuar 12 persona të cilët akuzohen se i kanë shkaktuar shtetit shqiptar dëm ekonomike deri në 2 milionë euro duke shmangur detyrimet tatimore. Nga 12 të arrestuarit, 9 prej tyre janë shtetas italianë dhe 3 shqiptarë.

Të arrestuarit kishin organizuar një skemë mashtrimi për shmangien e detyrimeve tatimore në fushën e shërbimeve të konsulencave që i shisnin në shtetin italian. Ata kanë rritur në mënyrë fiktive shpenzimet, duke bërë të mundur barazimi i tyre me të ardhurat dhe kështu kanë shmangur detyrimin për të paguar vlerën reale të tatim fitimit.

Dyshohet se në këtë veprimtari kriminale janë të përfshirë persona dhe subjekte të tjera, si dhe funksionarë të administratës shtetërore, për të cilat vazhdojnë hetimet dhe veprimet proceduriale. Ky aktivitet kriminal dyshohet që shtrihet edhe në shtetin Italian, aty ku edhe operojnë përfituesit kryesorë, të cilët janë subjekte që përfitojnë të gjithë vlerën e shërbimeve të dyshuara fiktive të konsulencës, e cila përllogaritet mbi 6 milionë euro.

Burimi: Lapsi.al

Probleme me sigurinë ushqimore/ AKU masa ndëshkuese në Durrës, Elbasan dhe Kukës

Tuesday, 19 December 2023 15:33

• Written by Lapsi.al

Autoriteti Kombëtar i Ushqimit njofton se në prag të festave të fundvitit, ka intensifikuar kontrollet për cilësinë ushqimore.

Gjatë kontrolleve të fundit, janë marrë masa ndëshkuese për tre subjekte në Elbasan, Durrës dhe Kukës për ushqim të pasigurtë.

Në një subjektet është bllokuar një sasi qumështi e cila është vendosur të asgjesohet dhe është marrë masë administrative e ndërprerjes së pjesshme së veprimtarisë prodhuese të produktit. Dy subjektet e tjera janë konstatuar me mungesë e dokumentacionit në sistemin e vetëkontrollit HACCP dhe mangësi në etiketim.

Për këto shkelje të konstatuara trupat inspektuese kanë vendosur masat administrative me “gjobë” në vlerën 500.000 lekëve.

NJOFTIMI I AKU-së:

Autoriteti Kombëtar i Ushqimit në vijim të veprimtarisë së tij, ka ushtruar kontrolle në gjithë territorin për garantimin e sigurisë ushqimore në vend.

Gjatë kontrolleve të ushtruara në qarqet Durrës, Elbasan dhe Kukës, trupat inspektuese të AKU-së në tre subjekte me natyrë aktiviteti, “njësi prodhimi dhe përpunimi të qumështit dhe nënprodukteve të tij”, “Restorant me produkte mikse” dhe “Njësi tregtimi të produkteve ushqimore”, kanë konstatuar probleme me sigurinë ushqimore.

Në njërin nga subjektet referuar raport provës së produktit qumësht i freskët, është bllokuar një sasi qumështi me destinacion asgjësimin si ushqim i pasigurt dhe është marrë masë administrative e ndërprerjes së pjesshme së veprimtarisë prodhuese të produktit të qumështit të freskët, ndërsa në dy subjektet e tjera janë konstatuar, mungesë e dokumentacionit në sistemin e vetëkontrollit HACCP dhe mangësi në etiketim.

Për këto shkelje të konstatuara trupat inspektuese kanë vendosur masat administrative me “gjobë” në vlerën 500’000 lekëve.

AKU në prag të festave të fundvitit, ka intensifikuar edhe më tej kontrollet për të mbrojtur shëndetin e konsumatorëve.

Burimi: Lapsi.al

Publikohen datat e provimeve të Maturës Shtetërore për vitin 2024

Tuesday, 19 December 2023 15:29

• Written by Lapsi.al

Ministria e Arsimit ka publikuar datat e provimeve të Maturës 2024.

Në 3 qershor maturantët do i nënshtrohen provimit të gjuhës së huaj dhe në 10 qershor do të zhvillojnë provimin në gjuhë shqipe dhe letërsi. Në 18 qershor 2024 është caktuar provimi i matematikës, ndërsa në 24 qershor do të mbahet provimi i lëndës me zgjedhje.

Burimi: Lapsi.al

Dalin shifrat e INSTAT/ Korçarët më “punëtorët”, lezhjanët më “dembelët”

Monday, 18 December 2023 23:16

• Written by Scan

Sipas shifrave zyrtare të INSTAT, në vitin 2022, forcat e punës në Shqipëri numërojnë rreth 1.45 milion persona, të cilët përfaqësojnë popullsinë aktive të përbërë nga të punësuarit dhe të papunët në vend. ‘Scan Intel’, nisur nga të dhënat, ka analizuar tregun e punës në Shqipëri për vitin e kaluar, sipas qarqeve, për të parë se si variojnë treguesit.

Referuar “Vjetarit Rajonal Statistikor”, shkalla më e lartë e pjesëmarrjes në forcat e punës është regjistruar në qarkun e Korçës me 69.6%, pasuar nga Elbasani me 69.3 % dhe Berati me 69.1%. Shkalla e pjesëmarrjes në forcat e punës hedh dritë mbi potencialin e ekonomisë së një vendi për të angazhuar popullsinë në veprimtari produktive. Pra, nisur nga këto të dhëna duket se qarku i Korçës, Elbasanit dhe Beratit janë qarqet me potencialin më të lartë sa i përket pjesëmarrjes në forcat e punës.

Nga ana tjetër, shkalla më e ulët e pjesëmarrjes në forcat e punës është regjistruar në qarkun e Lezhës dhe të Dibrës me 53% dhe 56.5% përkatësisht, ndërkohë që mesatarja për vendin është 62.4%. Nisur nga grafiku shohim se përveç Lezhës, Dibrës dhe Tiranës, të gjithë qarqet e tjera regjistrojnë një shkallë të pjesëmarrjes në forcat e punës më të lartë se mesatarja kombëtare. Krahasuar me vitin 2021, ky tregues është rritur pothuaj në të gjitha qarqet me përjashtim të Gjirokastrës.

Por si paraqitet shkalla e punësimit sipas qarqeve? Nga të dhënat e INSTAT të përpunuara nga ‘Scan Intel’, raporti i të punësuarve të moshës 15 vjeç e lart ndaj popullsisë të së njëjtës moshë është 55.5% në vitin 2022. Shkalla më e lartë e punësimit është regjistruar në qarkun e Beratit me 64.6%, ndjekur nga qarku i Elbasanit me 64.4%. Pra, shkalla më e lartë e punësimit është regjistruar në ato qarqe që kanë edhe pjesëmarrjen më të lartë në forcat e punës. Shkalla më e ulët regjistrohet në qarkun e Lezhës me 41.0% dhe të Dibrës me 46.4%. Në Lezhë, Dibër, Tiranë dhe Vlorë shkalla e punësimit është më e ulët se mesatarja kombëtare. Krahasuar me vitin 2021, shkalla e punësimit është rritur pothuaj në të gjitha qarqet përveç Gjirokastrës.

Nga këndvështrimi gjinor, diferenca më e madhe e shkallës së punësimit për popullsinë 15 vjeç e lart, është shënuar në qarkun e Vlorës, ku hendeku është 16,1 pp, ndërsa mesatarja në Shqipëri është 11,1 pp. Ndërkohë, analiza e punësimit sipas veprimtarive ekonomike, tregon se shërbimet dhe bujqësia kanë pjesën më të madhe të të punësuarve, 44.2% dhe 33.9% përkatësisht, ndërsa të punësuarit në industri përbëjnë vetëm 21.9%.

Referuar të dhënave të raportit, në vitin 2022, kishte rreth 160 mijë njerëz të papunë në Shqipëri, që është e barabartë me 10.9% të forcës së punës gjithsej. Shkalla më e ulët e papunësisë është regjistruar në qarkun e Gjirokastrës me 3.5% dhe Kukësit 4.9%, ndërsa ajo më e larta është regjistruar në Lezhë me 22.7%, Dibër me 17.8% dhe Vlorë me 15.3%. Krahasuar me vitin 2021, papunësia vihet re të jetë rritur në qarkun e Dibrës, Elbasanit, Kukësit, Lezhës dhe Tiranës.

/Marrë nga SCAN