Palestina: KS-OKB të ndërhyjë urgjentisht për të ndaluar sulmet e Izraelit

Wednesday, 06 December 2023 19:23

• Written by AA

Zëdhënësi i Presidencës palestineze, Nabil Abu Rudeineh i bëri thirrje Këshillit të Sigurimit të Kombeve të Bashkuara (KS-OKB) të ndërhyjë urgjentisht ndaj sulmeve të Izraelit kundër popullit të Palestinës në Rripin e Gazës dhe Bregun Perëndimor.

"Në kohën kur Izraeli po kryen çdo ditë masakra kundër popullit të Palestinës në Rripin e Gazës, forcat pushtuese dhe kolonialistët terroristë vazhdojnë krimet e tyre të përditshme me bastisjet dhe ekzekutimet e tyre në terren kundër qyteteve, qytezave dhe kampeve palestineze në Bregun Perëndimor", deklaroi Abu Rudeineh për agjencinë zyrtare palestineze të lajmeve WAFA.

"Izraeli po kryen terror në çdo vend kundër popullit palestinez", tha Abu Rudeineh duke i bërë thirrje OKB-së të ndërhyjë menjëherë për të ndaluar gjakderdhjen palestineze dhe këtë sulm gjithëpërfshirës që kryhet nën hijen e heshtjes ndërkombëtare të paprecedentë.

Duke mbajtur përgjegjës administratën e SHBA-së për përshkallëzimin e tensioneve, zëdhënësi palestinez bëri thirrje që t'i bëhet presion Izraelit për të ndalur sulmet kundër popullit palestinez në Gaza, Kudsin Lindor dhe Bregun Perëndimor.

"Këto sulme nuk do të sjellin qetësi dhe siguri për askënd", theksoi Abu Rudeineh i cili përsëriti se Izraeli dhe SHBA-ja nuk kanë opsion tjetër veçse të ndalin sulmet dhe t'i japin fund pushtimit.

Ai vuri në dukje se dështimet e zgjidhjeve ushtarake janë provuar dhe se zgjidhja e vetme është njohja e lirisë dhe pavarësisë së popullit të Palestinës në përputhje me legjitimitetin dhe ligjin ndërkombëtar.

Burimi: AA

Agjencia e OKB-së: Gaza është bërë "një nga vendet më të rrezikshme në botë"

Wednesday, 06 December 2023 19:19

• Written by AA

Agjencia e OKB-së për Refugjatët Palestinezë (UNRWA) ka deklaruar se Rripi i Gazës është bërë "një nga vendet më të rrezikshme" në botë, mes sulmeve të vazhdueshme izraelite në enklavën e rrethuar palestineze.

"I gjithë Rripi i Gazës është bërë një nga vendet më të rrezikshme në botë", shkroi UNRWA në platformën sociale X.

UNRWA gjithashtu tha se "nuk ka ku të shkohet si strehë" në Gaza, duke shtuar se strehimoret e saj janë "mbushur" me palestinezë të zhvendosur.

Të hënën, UNRWA tha se mbi 85 për qind e popullsisë së Gazës aktualisht janë të zhvendosur, pothuajse 1,9 milion nga 2,3 milionë banorë gjithsej, si dhe 1,2 milion njerëz të zhvendosur brenda vendit janë strehuar në 156 instalimet e saj.

Të premten e kaluar, Izraeli rifilloi ofensivën ushtarake në territorin palestinez pas përfundimit të një pauze humanitare 1-javore me grupin palestinez Hamas.

Të paktën 16.248 palestinezë janë vrarë dhe më shumë se 43.616 të tjerë janë plagosur në sulmet e pamëshirshme ajrore dhe tokësore në enklavë që nga 7 tetori pas një sulmi ndërkufitar nga Hamasi.

Burimi: AA

Forcat izraelite arrestuan 60 palestinezë në Bregun Perëndimor

Wednesday, 06 December 2023 19:14

• Written by AA

Forcat izraelite arrestuan 60 palestinezë gjatë bastisjeve që kryen në rajone të ndryshme të Bregut Perëndimor nën pushtim.

Shoqata e të Burgosurve Palestinezë dhe Komiteti për Çështjet e të Burgosurve Palestinezë i lidhur me Organizatën për Çlirimin e Palestinës bënë një deklaratë të përbashkët me shkrim për këtë çështje.

Në deklaratë thuhet se forcat izraelite kryen bastisje gjatë natës dhe orëve të mëngjesit në adresa të ndryshme në Bregun Perëndimor dhe arrestuan 60 palestinezë.

Bëhet e ditur se 30 nga të arrestuarit janë nga qyteti Jenin në veri të Bregut Perëndimor, se gjatë bastisjeve të arrestuarit dhe të afërmit e tyre janë përballur me goditje dhe kërcënime, ndërsa janë dëmtuar dhe shkatërruar shtëpitë e tyre.

Ka arritur në 3.640 numri i palestinezëve të arrestuar që nga 7 tetori në Bregun Perëndimor dhe Kudsin Lindor nën pushtim.

Që nga 7 tetori, kur forcat izraelite filluan sulmet e tyre ndaj Gazës, tërheq vëmendjen se ka patur rritje të ndalimeve dhe bastisjeve ndaj palestinezëve në Bregun Perëndimor dhe Kudsin Lindor.

Burimi: AA

Rritet në 83 numri i ushtarëve izraelitë të vrarë gjatë luftimeve në Gaza

Wednesday, 06 December 2023 19:11

• Written by AA

Ushtria izraelite njoftoi se është rritur në 83 numri i ushtarëve të vrarë izraelitë gjatë luftimeve brenda në Rripin e Gazës.

Në një deklaratë me shkrim nga ushtria izraelite thuhet se edhe një ushtar izraelit ka humbur jetën në konfliktet në Gaza.

Bëhet e ditur se është rritur në 83 numri i ushtarëve izraelitë të vrarë gjatë konflikteve në Rripin e Gazës pas sulmit tokësor që filloi ushtria izraelite.

Izraeli filloi sulmin e tij tokësor në veri të Gazës më 27 tetor dhe më 3 dhjetor ndaj rajonit Khan Younis, vendbanimi më i madh në jug dhe i cili më pas ishte shpallur si "zonë e sigurt" nga administrata e Tel Avivit.

Burimi: AA