Turqia dënon 'sulmet e neveritshme' kundër Kuranit në Holandë

Sunday, 24 September 2023 22:10

• Written by AA

Turqia dënoi ashpër të shtunën “sulmet e neveritshme” kundër librit të shenjtë islam, Kuranit, jashtë ambasadave të disa shteteve anëtare të Organizatës së Bashkëpunimit Islam, përfshirë ambasadën turke, në Holandë.

Në një deklaratë, Ministria e Jashtme turke tha se Ankaraja dënon përhapjen e këtyre “sulmeve provokuese”, të cilat lejohen të kryhen në vendet evropiane nën maskën e lirisë së shprehjes.

“Vendet ku kanë ndodhur sulme të tilla, tani duhet të marrin masa efektive kundër këtyre provokimeve, të cilat njihen nga Kombet e Bashkuara si akte të urrejtjes fetare dhe shkelje të ligjit ndërkombëtar”, thuhet më tej në deklaratë.

Türkiye u bëri thirrje autoriteteve holandeze të ndërmarrin veprimet e nevojshme kundër autorëve dhe të marrin masa për të parandaluar përsëritjen e sulmeve të tilla.

Më herët, Edwin Wagensveld, udhëheqësi i PEGIDA-s, një grup islamofobik, grisi kopjet e librit të shenjtë islam, Kuranit, para ambasadave të disa vendeve muslimane, përfshirë ambasadën turke.

Figura dhe grupe islamofobike në Evropën Veriore muajt e fundit kanë kryer vazhdimisht djegie të Kuranit dhe përpjekje të ngjashme për të përdhosur librin e shenjtë, duke shkaktuar zemërim nga vendet muslimane dhe bota.

Burimi: AA

Turqi, shtetasja gjermane pranon Islamin në Aydın

Friday, 22 September 2023 22:39

• Written by AA

Shtetasja gjermane, Jennifer Paula Görlitz u bë muslimane në një ceremoni që u mbajt në Myftini në rajonin Koçarlı në Aydın të Türkiye-s në të cilin ajo erdhi bashkë me bashkëshortin e saj.

Shtetasja gjermane, 40-vjeçarja Jennifer Paula Görlitz e cila jeton në Gjermani me bashkëshortin e saj Erdinç Efeoğlu, vendosi të bëhet muslimane pasi hulumtoi rreth Islamit.

Görlitz e cila erdhi në vendlindjen e bashkëshortit të saj Koçarlı, aplikoi në Myftininë e qytezës.

Myftiu Kazım Ünsal, në ceremoninë e mbajtur në institucion i shpjegoi Görlitz parimet e Islamit.

Görlitz shqiptoi shehadetin në prani të dëshmitarëve dhe më pas bëri lutje.

Myftiu Ünsal përgëzoi Görlitz dhe i dha asaj dokumentin e konvertimit dhe një Kuran me përkthim në gjuhën gjermane.

Burimi: AA

OKB: Ngërçi aktual në Siri është i patolerueshëm

Friday, 22 September 2023 22:28

• Written by AA

Kryetari i Komisionit të Pavarur Ndërkombëtar të OKB-së për Hetimin mbi Sirinë, Paulo Pinheiro, ka deklaruar se ngërçi aktual në Siri është i patolerueshëm, ndërsa vendi mbetet i pasigurt për kthimin e refugjatëve.

“Nuk ka fitues përfundimtar dhe vendi mbetet i pasigurt për kthimin e refugjatëve”, tha Pinheiro në prezantimin e një raporti në Këshillin e Sigurimit për të Drejtat e Njeriut të OKBs-së, të cilin Siria e hodhi poshtë si një “qasje e njëanshme” dhe “humbje kohe”.

“Përpara se Siria të zhytet më thellë në përshkallëzimin e dhunës dhe rënies ekonomike, ne u bëjmë thirrje aktorëve kryesorë të ndalojnë sulmet ndaj civilëve dhe t’u përgjigjen nevojave të tyre të rënda dhe i bëjmë thirrje qeverisë në Damask që të marrë parasysh dhe t’i përgjigjet pozitivisht aspiratave dhe të drejtave legjitime të sirianëve si çelës për t’i dhënë fund konfliktit”, tha Pinheiro.

Ai tha se të rinjtë sirianë po ikin “në kope” duke lënë pas “një shtet të copëtuar, një ekonomi të gjymtuar dhe shtëpi të shkatërruara”, pasi ata nuk besojnë më se kanë një të ardhme në vendin e tyre.

Ai theksoi se pavarësisht përpjekjeve diplomatike për të stabilizuar Sirinë, përfshirë ripranimin e saj në Ligën e Shteteve Arabe, sirianët po vuajnë nga përshkallëzimi i trazirave dhe luftimeve përgjatë vijave të shumta të frontit. Siç tha ai, ka shkelje dhe abuzime të vazhdueshme të të drejtave të njeriut në Siri.

- Qasje në ndihmë

“Pse është e tepërt të kërkosh që palët dhe komuniteti ndërkombëtar të sigurojnë që ndihma humanitare ndërkufitare të ofrohet në shkallën e nevojshme dhe në mënyrë të qëndrueshme…”, u shpreh Pinheiro.

Ai u bëri thirrje të gjitha palëve që të përmbahen nga pengimi i ndihmës humanitare për ata në nevojë.

“Dështimi kolosal në Këshillin e Sigurimit për të arritur një konsensus për të zgjatur pikën kufitare Bab Al-Hawa në muajin korrik është një kujtesë e ashpër se si politizimi i privon sirianët më të rrezikuar nga ndihma shumë e nevojshme”, tha ai.

Haydar Ali Ahmad, i dërguari sirian në OKB në Gjenevë, nga ana e tij, tha në këshill se “mbajtja e takimeve dhe mandateve të tilla në mënyrë të përsëritur është e pakuptimtë dhe një humbje kohe, burimesh dhe përpjekjesh”.

“Kanë kaluar 12 vjet dhe ky komision akoma po insiston që të miratojë të njëjtën qasje të njëanshme”, tha ai.

Burimi: AA

Abbas në Asamblenë e Përgjithshme të OKB-së: Zgjidhja e çështjes palestineze, kyç për paqen në Lindjen e Mesme

Friday, 22 September 2023 22:23

• Written by AA

Presidenti palestinez Mahmoud Abbas tha se paqja në Lindjen e Mesme nuk mund të arrihet pa siguruar të drejtat e palestinezëve.

Komentet e tij erdhën në një fjalim në sesionin e 78-të të Asamblesë së Përgjithshme të OKB-së në New York, ku ai paralajmëroi Izraelin kundër kthimit të luftës politike në “përleshje fetare”, në lidhje me inkursionet dhe shkeljet kundër vendeve të shenjta islame dhe të krishtera në Kuds.

“Izraeli po shkel rezolutat përkatëse të Kombeve të Bashkuara dhe ka hequr dorë nga Marrëveshjet e Oslos dhe ne ende kemi shpresë për zbatimin e vendimeve tuaja për t’i dhënë fund pushtimit izraelit në tokën tonë”, tha Abbas.

Abbas i kërkoi shefit të OKB-së Antonio Guterres që të bëjë përgatitjet për një konferencë ndërkombëtare të paqes për procesin e ngecur të paqes “për shkak të politikave izraelite”.

Konferenca “mund të jetë mundësia e fundit për ta mbajtur të mundshme zgjidhjen me dy shtete dhe për ta parandaluar përkeqësimin më serioz të situatës”, tha ai.

Abbas kërkoi “hapa praktikë” për të njohur shtetin palestinez dhe për të pasur anëtarësim të plotë në OKB.

Tensionet janë rritur në gjithë Bregun Perëndimor në muajt e fundit si pasojë e bastisjeve të përsëritura izraelite në qytetet palestineze.

Bisedimet e paqes midis palestinezëve dhe izraelitëve kanë ngecur që nga prilli i vitit 2014 për shkak të refuzimit të Tel Avivit për të ndaluar ndërtimin e vendbanimeve kolone në territoret e pushtuara dhe për të liruar të burgosurit palestinezë. Ata gjithashtu i janë shmangur zgjidhjes me dy shtete.

Burimi: AA