Mickoski: Nuk më pengon gjuha shqipe, unë përpiqem ta mësoj

Friday, 27 March 2026 09:04

• Written by /AA

“Asnjë gjuhë në botë nuk më shqetëson dhe nuk do të më shqetësojë”, ka thënë kryeministri i Maqedonisë së Veriut.

Kryeministri i Maqedonisë së Veriut, Hristijan Mickoski, deklaroi se gjuha shqipe nuk i paraqet problem dhe se madje përpiqet ta mësojë atë, raporton Anadolu.

Duke folur në Kuvend pas një pyetjeje deputeti, Mickoski theksoi se sipas Kushtetutës, gjuha zyrtare në gjithë territorin e shtetit është gjuha maqedonase dhe alfabeti i saj cirilik. Ai shtoi se në komunat ku më shumë se 20 për qind e popullsisë i përket një komuniteti të caktuar, përdoret edhe gjuha e atij komuniteti.

“Asnjë gjuhë në botë nuk më shqetëson dhe nuk do të më shqetësojë. Nuk e di pse jeni të mërzitur, por sipas Kushtetutës, gjuha zyrtare në gjithë territorin është gjuha maqedonase dhe shkrimi i saj cirilik. Në komunat ku më shumë se 20 për qind e popullsisë i përket një komuniteti të caktuar, përdoret edhe gjuha e atij komuniteti. Ndihuni të lirë të përdorni shqipen, madje unë përpiqem ta mësoj dhe studioj. Sa më shumë gjuhë di, aq më i pasur jam”, tha Mickoski.

Debati për përdorimin e gjuhëve është intensifikuar pas disa ngjarjeve të fundit në qytetin e Tetovës. Në një vizitë, ministrja e Arsimit dhe Shkencës, Vesna Janevska, u pyet nga gazetarët nëse kishte sjellë përkthyes me vete.

Ministrja u përgjigj se nuk kishte nevojë për përkthyes dhe se nuk e kupton pse dikujt do t’i duhej përkthyes për të ditur gjuhën maqedonase në Maqedoni, deklaratë që shkaktoi reagime të shumta në publik dhe e rriti më tej debatin për çështjen e gjuhëve në vend.

Ulet çmimi i naftës në Shqipëri, vendimi i Bordit të Transparencës hyn në fuqi

Thursday, 26 March 2026 19:46

• Written by Mexhis

Bordi i Transparencës ka vendosur këtë të enjte, uljen e çmimeve të karburanteve në vend, në reflektim të lëvizjeve në bursën ndërkombëtare Platts të Mesdheut.

Sipas njoftimit zyrtar, në tregjet ndërkombëtare është shënuar një rënie e çmimit të benzinës me 3.35 dollarë për ton dhe e gazoilit me 7.1 dollarë për ton krahasuar me datën 25 mars.

Si rrjedhojë, Bordi ka përcaktuar çmimet e reja tavan për tregun vendas:

Çmimi me pakicë i gazoilit (standardi SSH EN 590) nuk duhet të kalojë 203 lekë për litër, ndërsa me shumicë 191 lekë për litër.

Çmimi me pakicë i benzinës nuk duhet të kalojë 175 lekë për litër, ndërsa me shumicë 163 lekë për litër.

Vendimi do të hyjë në fuqi sot, më 26 mars, në orën 18:30 dhe do të mbetet në fuqi deri në mbledhjen e ardhshme të Bordit.

Autoritetet theksojnë se Bordi i Transparencës nuk përcakton çmimin e naftës bruto, por vetëm çmimet e nënprodukteve si gazoili, benzina dhe gazi i lëngshëm, bazuar në lëvizjet e bursës së Mesdheut dhe kursin e këmbimit të dollarit.

Gjithashtu, bëhet me dije se institucioni cakton vetëm marzhet maksimale të fitimit për operatorët, ndërsa elementët e tjerë të çmimit mbeten të pandryshueshëm.

Ministria e Ekonomisë dhe Inovacionit, në bashkëpunim me Ministrinë e Financave dhe atë të Infrastrukturës dhe Energjisë, deklaron se është e angazhuar për mbrojtjen e konsumatorëve dhe garantimin e konkurrencës së ndershme në treg.

Ndërkohë, operatorët e tregtimit të karburanteve paralajmërohen për zbatimin rigoroz të vendimit. Në rast shkeljesh, autoritetet njoftojnë se do të aplikohet pezullimi i aktivitetit.

Institucionet shtojnë se janë në monitorim të vazhdueshëm të tregjeve ndërkombëtare, për të reaguar në kohë ndaj çdo ndryshimi të mëtejshëm të çmimeve.

“Pse i trembet garës?”, Salianji – Berishës: Demokratët kërkojnë rregulla dhe votë

Thursday, 26 March 2026 17:24

• Written by Mexhis

Ish-deputeti Ervin Salianji ka reaguar ndaj akuzave të bëra nga kreu i Partia Demokratike, Sali Berisha, lidhur me pretendimet për “vetëpërjashtimin” e tij nga gara për shkak të lidhjeve të aluduara me krimin.

Në reagimin e tij, Salianji thekson se këto pretendime do të sqarohen me kohën, por ngre disa pyetje thelbësore mbi funksionimin e demokracisë brenda partisë, duke kërkuar garë të hapur dhe votë të lirë për anëtarët.

“Kush ka lidhje dhe me kë do kemi kohë e do i qartësojmë, por pyetjet mbeten; a do të ketë garë të hapur? A do të ketë votë të lirë për demokratët? Si do fitojë Partia Demokratike? Kur? A mbahet përgjegjësi për rezultatet dhe premtimet? A mundet një kandidat të përjashtojë kandidatin tjetër”, shprehet ai.

Salianji mohon të jetë vetëpërjashtuar, duke theksuar se vijon të jetë pjesë e Partisë Demokratike dhe se ka kontribuar në të, madje edhe duke përballuar pasoja që i cilëson si “burg politik”.

Ai akuzon drejtuesit e partisë se, në mungesë të një gare reale, “shpiken romane me ‘vetëpërjashtime’”, ndërsa thekson se çështja kryesore nuk është përjashtimi i individëve, por mungesa e konkurrencës së ndershme.

“Problemi nuk është kush ‘përjashtohet’, por pse nuk lejohet gara… pse i trembet garës? Unë kërkoj vetëm një gjë: rregulla dhe votë, këtë kërkojnë demokratët, shoqëria dhe partnerët. Pjesa tjetër është propagandë për të mbuluar frikën”, deklaron Salianji.

Gjykata Kushtetuese rrëzon kërkesën e Evis Berberit, ish-kreu i ARRSH-së mbetet në burg

Thursday, 26 March 2026 17:24

• Written by Mexhis

Gjykata Kushtetuese ka marrë vendimin lidhur me kërkesën e Evis Berberit, ish-drejtues i Autoriteti Rrugor Shqiptar, duke rrëzuar pretendimin e tij.

Vendimi i Gjykatës lidhej vetëm me masën e sigurisë, ndërsa trupa gjykuese ka vendosur që ajo të mbetet në fuqi.

Si pasojë, ish-vartësi i ish-zv/kryeministres Belinda Balluku, Evis Berberi do të vijojë të qëndrojë në burg.

Sakaq, pretendimet e tjera të Berberit nuk janë marrë në konsideratë nga Gjykata Kushtetuese, ndërsa në lidhje me papërdoshmërinë të dhënave, ai duhet të bëjë kërkesë në Gjykatën e Shkallës së Parë.