500 mijë euro ‘të thata’, apartament dhe garazh i sekuestrohen ish-zyrtares Alda Klosi

Thursday, 13 March 2025 08:23

• Written by /JOQ

Gjykata e Tiranës ka konfiskuar sot pasuritë e ish-zyrtares së financave Alda Klosi dhe ish-bashkëshortit të saj, ku përfshihet një apartament, garazh dhe një shumë prej 500 mijë euro para të thata.

Shumat e pajustifikueshme të drejtoreshës së ish-ministrit Arben Ahmetaj ishin subjekt deklarimi prej vitit 2016, dhe reflektojnë nivelin e lartë të korrupsionit dhe abuzimit me fondet publike në administratë.

Prokuroria tha sot se 368.000,00 (treqind e gjashtëdhjetë tetëmijë) lekë, 15.600,00 (pesëmbëdhjetë mijë e gjashtëqind) dollarë amerikan, 462.950,00 Euro, janë sekuestruar për llogari të procedimit penal, mes të tjerave.

Klosi ishte në qendër të skandalit të vjedhjes së më shumë se rreth 700 000 euro nga pastruesja në shtëpinë e saj, çka solli më pas zbulimin e abuzimeve madhore të zyrtares.

Njoftimi i Prokurorisë:

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, gjykata konfiskoi pasuritë e shtetases A.K. dhe ish-bashkëshortit të saj, të akuzuar për veprën penale ‘Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur e nëpunësve publik ose i çdo personi tjetër që ka detyrim ligjor për deklarim’ parashikuar nga neni 257/a/2 i Kodit Penal.

Nga procedimi pasuror nr.05, 2022, rezultoi se e pandehura/subjekti i hetimit pasuror A.K. e cila është përfshirë si subjekt deklarimi në ILDKPKI që në vitin 2016, nuk ka deklaruar në këtë institucion pasurinë që nuk e justifikon atë me burime të ligjshme të të ardhurave.

Nga analiza e fakteve dhe e dokumentacionit të administruar rezulton se pasuritë e paluajtshme të llojit apartament dhe garazh, që zotërohen nga ajo dhe nga personi i lidhur, janë pasuri të pajustifikuara nga të ardhurat e ligjshme. Këto pasuri të paluajtshme janë fshehur dhe nuk janë deklaruar në deklaratat e ILDKPI nga personi i hetuar A.K.

Sa më sipër, si dhe në mbështetje të neneve 3, 5, 7, 12/b, 14, 15 deri në 22, 23, 24, 28-38 e vijues, të Ligjit nr.10192 datë 03/12/2009 “Për parandalimin dhe Goditjen e Krimit të Organizuar dhe Trafikimit Nëpërmjet Masave Parandaluese kundër Pasurisë”, i ndryshuar, si dhe në nenin 302 të Kodit të Procedurës Civile, me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë u konfiskuan pasuritë e mëposhtme:

Shuma monetare 368.000,00 (treqind e gjashtëdhjetë tetëmijë) Lekë, 15.600,00 (pesëmbëdhjetë mijë e gjashtëqind) USD dollarë amerikan, 462.950,00 (katërqind e gjashtëdhjetëedymijë e nëntëqindepesëdhjetë) Euro, sekuestruar për llogari të procedimit penal nr. 9220/2022 dhe arkëtuar në llogarinë e Prokurorisë në 10.01.2023;

Apartament me siperfaqe 85.09 m2 të shfrytëzueshme me numër pasurie 6/572+1-35, ZK 8210, Vol. 42,Fq 127 pasuri e ndodhur në Tiranë, në pronësi të shtetasit A.K.; dhe

Garazh me sipërfaqe 14.06 m2 të shfrytëzueshme, pasuri e ndodhur në Tiranë, në pronësi të shtetasit A.K.

Nga Iris Luarasi te Endrit Braimllari, PS publikon listën me "surpriza" në Tiranë

Thursday, 13 March 2025 08:15

• Written by /Tpz.al

Ogerta Manastirliu ka njoftuar emrat e kandidatëve për deputetë në Tiranë nga Partia Socialiste. 

Një nga emrat surprizë në listën e mbyllur është pedagogia e njohur, Iris Luarasi, ndërkohë që qarkun e kryeson Edi Rama. Në listën e mbyllur ka më së shumti gra dhe është mënjanuar "garda e vjetër", një pjesë e të cilëve janë lënë të kandidojnë në listën e hapur. 

Në listën e hapur është edhe emri i Endrit Braimallarit, një nga njerëzit e rëndësishëm të LSI-së së dikurshme, por që tani ka kaluar me PS. 

Lista e mbyllur: Edi Rama, Ogerta Manastirliu, Elisa Spiropali, Lindita Nikolla, Taulant Balla, Adea Pirdeni, Albana Koçiu, Igli Hasani, Delina Ibrahimaj, Ilva Gjuzi, Iris Luarasi, Erion Malaj. 

Lista e hapur: Andi Seferaj, Anila Denaj, Antonela Dedej, Arben Pëllumbi, Blendi Gonxhe, Blendi Sulaj, Blerina Gjylameti, Endrit Braimllari, Entela Ramisaço, Erion Braçe, Ermonela Felaj, Ervin Hoxha, Etilda Gjonaj, Etjen Xhafaj, Fatmir Xhafaj, Florjan Pullazi, Halit Valteri, Julinda Dhama, Klotilda Bushka, Mimi Kodheli, Olta Xhaçka, Ornaldo Rakipi, Pandeli Majko, Plarent Ndreca, Sofika Lleshi, Toni Gogu, Xhemal Qefalia, Ylli Shehu, Roi Bashaj, Persida Shkrepa, Mirgit Vata, Kejsi Elezi, Halil Koloshi, Glinxhet Madhi, Eldi Çepeli, Edlira Dyrmishaj, 

SPAK nxjerr prova të reja. A është rënduar pozita e Veliajt?

Tuesday, 11 March 2025 21:32

• Written by Lapsi.al

Strategjia që Erion Veliaj shpalli një ditë më parë me shpresën se Apeli i GJKKO-së do ta nxjerrë nga burgu mori këtë të martë një goditje të fortë. Prokurorët Altin Dumani dhe Olsi Dado janë paraqitur përpara gjykatësit Engert Pëllumbi, me fakte të reja që kërkojnë të përligjin mbajtjen e tij në izolim. Burime të gazetarëve pranë SPAK flasin për disa audio-përgjime ambientale dhe telefonike të bëra ndaj kryebashkiakut Erion Veliaj, i cili komunikon me vëllain e tij Arbër Veliaj ku përmenden dhjetëra emra gazetarësh dhe bashkëpunëtorësh të tij dhe ku jepen porosi se si duhen mbajtur me të mira mediat. Menjëherë pas seancës gjyqësore që zgjati mbi shtatë orë gazetarja Klodiana Lala pohoi se këto fakte të reja mund ta rëndojnë edhe më pozitën e kryebashkiakut. Ndërsa Avokati Genc Gjokutaj tha se provat mund të jenë nxjerrë nga celulari që i është sekuestruar Veliajt, ndonëse ai nuk dha një provë për këtë.

Read more ...

Portali e-Albania s’ofron asnjë shërbim, miliardat e ‘teknologjisë’ nuk dihet ku shkojnë

Tuesday, 11 March 2025 08:39

• Written by /JOQ

Qytetarë të lodhur e të zhgënjyer kanë denoncuar sot pamundësinë e kryerjes së veprimeve në portalin qeveritar e-Albania, i cili refuzon shërbimet dhe dokumentet për qytetarët.

Denoncuesit tregojnë se portali ndërpret lidhjen sapo i kërkohet dokumenti për të prodhuar, në rastin në fjalë për sigurimet shoqërore, duke shtuar burokracitë dhe humbur kohën e vlefshme të taksapaguiesve.

“E albania bie, nuk mundem te perdor asgjë. Doja te merrja nje vertetim per kontributet e sigurimet shoqerore. Nuk funksionon. Sot e hapa dhe nuk funksionon”, shkruan qytetarja e zhgënjyer, pa ditur se ku tjetër të drejtohet.

Digitalizimi i shërbimeve reklamohet nga qeveria si “një hap i domosdoshëm” për përmirësimin e administratës dhe lehtësimin e jetës së qytetarëve por situata aktuale ka nxitur një valë shqetësimesh dhe kritikash.

Shumë qytetarë kërkojnë një ndërhyrje nga autoritetet për të siguruar që sistemi të funksionojë siç duhet dhe për të mundësuar shërbimet në mënyrë të sigurt dhe të shpejtë.

Pothuajse çdo ditë në redaksinë e JOQ ALBANIA mbërrijnë denoncime për problematikat e portalit në lëshimin e dokumenteve, sigurimet shoqërore apo shërbimet e studentëve.

Këto raste tregojnë se sa lehtë hidhen milionat e taksave të popullit  nga drejtoresha e AKSH, Mirlinda Karçanaj për oligarkët, pa u merakosur për shërbimet ndaj qytetarëve të thjeshtë.

Denoncuesit kanë raportuar se shumicën e kohës portali nuk punon ndërsa regjistrimet mund të kryhen vetëm nëse je me fat dhe rastis në “dy-minutëshin” e funksionimit. /JOQ