Do t’ju marrim gjithçka!” – SHBA kërcënon Iranin me shkatërrim total, zbulohen planet për goditje dhe çarmatim bërthamor
Sekretari amerikan i Mbrojtjes, Pete Hegseth, ka zbuluar detaje të forta nga prapaskenat e marrëveshjes së armëpushimit mes SHBA dhe Iranit, duke deklaruar se Uashingtoni ishte gati për një ofensivë shkatërruese nëse Teherani nuk do të pranonte negociatat.
Gjatë një konference në Pentagon, Hegseth tha se sipas kushteve të armëpushimit të shpallur këtë të mërkurë, çdo material bërthamor që Irani “nuk duhet ta ketë” do të hiqet. Ai theksoi se qëndrimi i administratës amerikane është i panegociueshëm: Irani nuk do të ketë armë bërthamore.
“Presidenti ka qenë i qartë që nga fillimi – nuk do të ketë armë bërthamore iraniane. Pikë”, u shpreh ai, duke shtuar se kjo nuk është thjesht deklaratë, por një vijë e kuqe që do të zbatohet.
Në të njëjtën linjë, presidenti Donald Trump deklaroi në Truth Social se SHBA do të punojë drejtpërdrejt me Iranin për të “gërmuar dhe hequr” rezervat e uraniumit, të cilat ishin në shënjestër të goditjeve ajrore amerikane.
Por prapaskenat tregojnë se situata ishte shumë më pranë përshkallëzimit total sesa dukej publikisht.
Hegseth konfirmoi se SHBA kishte përgatitur një plan të gjerë sulmi ndaj Iranit, që përfshinte objektiva kritike si ura dhe termocentrale, duke synuar paralizimin e plotë të infrastrukturës strategjike të vendit.
“Ata e dinin saktësisht shkallën e asaj që ishim të aftë të bënim”, tha ai, duke nënvizuar se kërcënimi ishte real dhe i detajuar.
Sipas tij, ishte pikërisht paralajmërimi i fortë i Trump që e detyroi Iranin të tërhiqej dhe të ulej në tryezën e negociatave.
“Trump në thelb u tha: ‘Mund t’jua marrim të gjitha. Eksportet e energjisë do të zhduken dhe ushtria amerikane ka aftësinë t’i godasë këto objektiva pa u ndëshkuar’”, deklaroi Hegseth.
Ky presion maksimal, sipas Pentagonit, ishte faktori vendimtar që çoi në arritjen e armëpushimit dyjavor, duke shmangur një përplasje të drejtpërdrejtë me pasoja të paparashikueshme për rajonin dhe më gjerë.
