Shefi i OSBE-së reagon për vrasjen e policit në veri të Kosovës: Të rivendoset paqja mes dy vendeve, autorët të sillen para drejtësisë

Sunday, 24 September 2023 21:49

• Written by Ora News

Shefi i Misionit të OSBE-së në Kosovë, Michael Davenport, ka dënuar me gjuhën më të ashpër sulmin ndaj Policisë së Kosovës në veri. Davenport tha se autorët e këtyre krimeve, të cilët i quajti të neveritshme, duhet të dalin menjëherë para drejtësisë.

“Dënoj me gjuhën më të ashpër të mundshme sulmin brutal të mëngjesit të sotëm mbi Policinë e Kosovës, ku një oficer mbeti i vrarë dhe një tjetër u plagos.

Paqja duhet të rivendoset dhe dialogu në interes të të gjitha komuniteteve duhet të vazhdojë”, tha Davenport.

Kujtojmë se të shtënat me armë zjarri po vazhdojnë ende në veri të vendit.

Burimi;Ora News

Strukturat e sigurisë së Kosovës: Sulmi në veri u krye nga njësi të specializuara të Serbisë

Sunday, 24 September 2023 21:46

• Written by Ora News

Zbardhen detaje nga sulmi me armë në Veri të Kosovës. "Express", duke iu referuar burimeve nga brenda strukturave të sigurisë, tregon se sulmi është kryer nga njësi të specializuara të sigurisë së Serbisë të cilat kanë shkelur integritetin dhe sovranitetin e Republikës së Kosovës.

Ky grup i armatosur i njësive të specializuara të Serbisë ka ndërhyrë drejtpërdrejt në veri dhe ka organizuar pritën e armatosur duke vrarë një polic dhe duke plagosur një tjetër. Krerët e shtetit të Kosovës kanë dënuar ashpër një incident të tillë tragjik.

Reagime kanë ardhur edhe nga ambasadat e huaja të cilat kërkojnë që autorët e rastit të sillen para drejtësisë. Reagime të shumta po vijnë edhe nga figura të tjera politike ndërkombëtare.

Ndërkohë që është duke u mbajtur edhe mbledhja e Këshillit të Sigurisë së Kosovës ka nisur në orën 10:00.

Burimi;Ora News

Ambasada e SHBA-së dënon ashpër vrasjen e policit në veri të Kosovës: Autorët para drejtësisë

Sunday, 24 September 2023 21:42

• Written by Ora News

Ambasadori i SHBA-ve, Jeff Hovenier ka reaguar pas ngjarjeve në veri të Kosovës, ku një polic u vra dhe u plagosën dy të tjerë. Hovenier ka shkruar se SHBA-të dënojnë ashpër sulmet e okrestruara, të dhunshme ndaj Policisë së Kosovës.

“PK ka përgjegjësi të plotë dhe legjitime për zbatimin e sundimit të ligjit në Kosovë. Autorët duhet dhe do të mbajnë përgjegjësi dhe do të sillen para drejtësisë.

I shpreh ngushëllimet në emër të Shteteve të Bashkuara familjes për vdekjen e rreshterit të Policisë së Kosovës të vrarë në krye të detyrës”, ka shkruar Hovenier.

Edhe ambasada e SHBA-ve, ka lëshuar një deklaratë ku ka dënuar këtë ngjarje tragjike. “Ne po e monitorojmë situatën nga afër dhe i dënojmë këto akte të dhunshme ndaj autoriteteve legjitime të Republikës së Kosovës”, thuhet në deklaratën e ambasadës.

Burimi; Ora News

Sulmi ndaj policisë së Kosovës, Kurti: Akt terrorist, krimi i organizuar nga Beogradi po sulmon shtetin tonë

Sunday, 24 September 2023 21:32

• Written by Ora News

Kryeministri i Kosovës, Albin Kurti ka reaguar për vrasjen e policit në veri të Kosovës, një reagim në Facebook duke e konsideruar një akt terrorist.

Kurti tha se “krimi i organizuar me mbështetje politike, financiare dhe logjistike nga Beogradi zyrtar po e sulmon shtetin tonë.”

“Të dashur qytetarë. Rreth orës 3 të mëngjesit sot, në fshatin Banjska të Leposaviqit, është sulmuar policia e Kosovës me ç’rast është vrarë një polic i Kosovës dhe një tjetër është plagosur.

I vrari është polic i rendit me gradën rreshter, kurse i plagosuri është pjesëtar i policisë kufitare. Në këto momente ende vazhdojnë gjuajtjet me armë zjarri të kalibrave të ndryshëm mbi policinë tonë. Sulmuesit janë profesionistë me maska e të armatosur edhe me armë të rënda.

Ne e dënojmë këtë sulm kriminal e terrorist. Krimi i organizuar me mbështetje politike, financiare dhe logjistike nga Beogradi zyrtar po e sulmon shtetin tonë. Në këtë betejë ne mbrojmë dhe zbatojmë ligjin, mbrojmë dhe ruajmë qytetarët pa dallim dhe Kosovën e pavarur.

Kriminelët ekzekutorë dhe urdhërdhënësit e tyre do të dështojnë, do të kapen, gjykohen e dënohen. Qeveria e Republikës së Kosovës dhe institucionet e shtetit janë të gatshme dhe të bashkërenduara për t’iu përgjigjur krimit dhe kriminelëve, terrorit dhe terroristëve. Policia e Kosovës e ka njoftuar familjen e policit të vrarë A.B. Polici i plagosur është jashtë rrezikut për jetë. Ngushëllime familjes dhe të gjithëve për policin tonë të vrarë. Shërim të shpejtë e të plotë policit të plagosur”, shkruan Kurti.

Burimi: Ora News